ក្រសួង​ធនធាន​ទឹក​អំពាវនាវ​ឱ្យ​​មាន​ការយក​ចិត្ត​ទុក​ដាក់​ខ្ពស់​ពីស្ថាន​ភាព​អាកាសធាតុ

         រាជ​ធានីភ្នំពេញ ៖ ក្រសួង​ធនធានទឹកនិងឧតុនិយមរបស់ប្រទេស​កម្ពុជានៅថ្ងៃទី២៦ មីនា ២០១៣​នេះ បានអំពាវនាវដល់ក្រសួង-ស្ថាប័ន អាជ្ញា​ធរ​​ដែនដី និង​ប្រជាពលរដ្ឋ​ដែលរស់នៅក្នុងខេត្ត​ក្រចេះ កំពង់ចាម សៀមរាប កំពង់ធំ បន្ទាយមាន​ជ័យ បាត់ដំបង ពោធិ៍​​សាត់ កំពង់ឆ្នាំង កណ្តាល ព្រៃវែង ស្វាយរៀង កំពង់ស្ពឺ តាកែវ និងរាជ​ធានីភ្នំពេញ បង្កើនការយកចិត្តទុក​ដាក់ខ្ពស់ ដើម្បី​ចៀសវាង​នូវគ្រោះថ្នាក់​ផ្សេងៗ ដែលអាចកើត​មាន​​ជាយថាហេតុ ដោយសារ​​ភ្លៀង ផ្គរ រន្ទះ ខ្យល់កន្រ្ទាក់ និងខ្យល់​កួច ចាប់ពី​ចុង​ខែ​មីនា ដល់ចុងខែមេសា ២០១៣នេះ ។

ការអំពាវ​នាវខាងលើនេះ ធ្វើឡើង​បន្ទាប់ពីក្រសួងធនធានទឹក និងឧតុនិយមបានតាមដាន​អាកាសធាតុឃើញថា ចាប់ពីចុង​ខែមីនា ដល់ខែ​​មេសា​២០១៣​នេះ​ កម្ពុជាបាននឹងទទួល​រងឥទ្ធិពលកម្រិតសម្ពាធ​ទាប (Low Pressure Gradient) ចាប់ពីផ្ទៃដីរហូត​ដល់​រយៈ​កម្ពស់​៦០០ម៉ែត្រ ប៉ុន្តែចាប់​ពីរយៈកម្ពស់៦០០ម៉ែត្រ រហូត​ដល់រយៈកម្ពស់៥៥០០​ម៉ែត្រ កម្ពុជានឹងទទួលរង​ឥទ្ធិពល​កម្រិត​សម្ពាធ​ខ្ពស់( Hight Pressure Gradient ) វិញ ។

សម្ពាធ​បរិយាកាសទំាង​ពីរខាងលើ នឹងបង្កឲ្យកម្ពុជាមានសីតុណ្ហភាព​អតិបរមាកើនឡើងខ្លំាងពី៣៩​អង្សាសេ ទៅ​៤០អង្សាសេ ព្រមជាមួយ​​នឹង​ការកើតឡើងបន្ថែម​ទៀតនូវបាតុភាពធម្មជាតិគ្រោះថ្នាក់មួយចំនួន​ ដូចជាភ្លៀង ផ្គរ រន្ទះ ខ្យល់ក​ន្រ្ទាក់ និងខ្យល់កួច។
យោងតាម​ សេចក្តីជូនដំណឹងលើកទី៣​របស់ក្រសួងធនធានទឹកដែល​ចុះហត្ថលេខាដោយលោក​ រដ្ឋមន្រ្តីក្រសួងធនធានទឹក និង​ឧតុ​និយម លឹម គានហោ នៅថ្ងៃទី២៦ មីនា ២០១៣នេះ ក៏បាន​បញ្ជាក់ទៀតថា ពេលនេះ​ក្រសួងធនធានទឹក និងឧតុនិយម​បាន​និង​កំពុង​ធ្វើការតាម​ដាន​ស្ថាន​ភាព​អាកាស​ ធាតុនេះជាប់ជាប្រចំា និង​ធ្វើសេចក្តីជូន​ដំណឹងបន្ថែមទៀត​ ក្នុងករណី​ចំាបាច់ ៕

ប្រភព  កោះសន្តិភាព