ពោធិ៍សាត់: អ្នកបើកបរម្នាក់មានសភាពស្រវឹងជោគ ទំនងទើបនឹងចេញពីខារ៉ាអូរខេ បើករថយន្តរេពេញផ្លូវបានបុកបុរសម្នាក់កំពុងដើរ បណ្ដាលឲ្យស្លាប់ភ្លាមនៅកន្លែងកើតហេតុ កាលពីវេលាម៉ោង១១និង១៥នាទីយប់ថ្ងៃទី៣០ ខែមីនា ឆ្នាំ២០១៣ ស្ថិតនៅលើផ្លូវលំគ្រួសក្រហម ក្នុងភូមិគល់ទទឹង ឃុំសន្ទ្រែ ស្រុកភ្នំក្រវាញ។ ជនរងគ្រោះដែលរថយន្តបុកស្លាប់នោះឈ្មោះ ភឿន ភី ភេទប្រុស អាយុ ២៤ឆ្នាំ រស់នៅភូមិក្រូចឆ្មារ ឃុំលាច ស្រុកភ្នំក្រវាញ។ ប្រភពពីអ្នកនៅក្បែរកន្លែងកើតហេតុ បានឲ្យដឹងថា នៅវេលាខាងលើគេឃើញបុរសរងគ្រោះ កំពុងតែដើរនៅលើចិញ្ចើមផ្លូវ ស្រាប់តែមានរថយន្តមួយគ្រឿងបើកយ៉ាងលឿនរេពេញផ្លូវពីកើតទៅលិច ក្នុងដំណើរស្របទិសគ្នា បានបុកជនរងគ្រោះយ៉ាងពេញទំហឹង បណ្ដាលឲ្យស្លាប់ភ្លាមៗនៅនឹងកន្លែងតែម្ដង។ ប៉ូលិសស្រុកភ្នំក្រវាញ បានឲ្យដឹងថា រថយន្តបង្ក កាមារី (ឆ្លាម) ពណ៌ខ្មៅ គ្មានស្លាកលេខ បើកបរដោយឈ្មោះ ព្រាប វណ្ណា ហៅមោក ភេទប្រុស អាយុ៤៩ឆ្នាំ មានទីលំនៅភូមិគល់ទទឹង ឃុំសន្ទ្រែ ស្រុកភ្នំក្រវាញ។ ក្រោយពេលកើតហេតុគេបានរត់គេចខ្លួនបាត់។ វត្ថុតាងរថយន្ត ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធី ចំណែកឯសាកសពជនរងគ្រោះ ត្រូវបានបងប្អូនយកទៅផ្ទះទាំងយប់ ដើម្បីធ្វើបុណ្យតាមប្រពៃណី៕
ប្រភពៈ CEN
