.jpg)
ផ្អើលពេញខេត្តកំពតថាថតទូរស័ព្ទជាប់រូបជំនាងផ្ទះ រូបថតដែលអះអាងថា ថតបានពិតៗ មិនមានការកែច្នៃ 1 of 3 កំពត: ទោះបីហេតុការណ៍ពិត ឬមិនពិតយ៉ាងណាក្ដី តែការភ្ញាក់ផ្អើលបាននិងកំពុងកើតឡើងក្រោយពីយុវជនម្នាក់បង្ហាញរូបដល់សាច់ញាតិគូដណ្ដឹងដែលអះអាងថា ខ្លួនសាកទូរស័ព្ទដោយថតជាប់ជំនាងផ្ទះពេលកំពុងដេកក្នុងអង្រឹងម្នាក់ឯងនាព្រលប់ថ្ងៃទី៩ ខែសីហា ឆ្នាំ២០១២ កន្លងមកនេះ។ ទោះបីខ្លួនជាអ្នកធ្វើនាមប័ណ្ណ និងច្នៃគំរូម៉ូដផ្សេងៗ ដែលមានអាសយដ្ឋាន នៅខណ្ឌសែនសុខ រាជធានីភ្នំពេញ តែម្ចាស់ទូរស័ព្ទអះអាងថា រូបមួយនេះខ្លួនថតបាននៅផ្ទះគូដណ្ដឹងស្ថិតក្នុងភូមិត្រពាំងធំ ឃុំត្រពាំងធំ ស្រុកទឹកឈូ ខេត្ដកំពត ពោលគឺមិនមានកាត់ត ឬបន្ថែមបន្ថយអ្វីឡើយ ហើយខ្លួនត្រូវបាននាំទៅឱ្យព្រះសង្ឃស្រោចទឹកដើម្បីបញ្ឈប់នូវភាពភ័យខ្លាចបន្ទាប់ពីជួបហេតុការណ៍នេះ។ មន្ដ្រីនៃអាជ្ញាធរមូលដ្ឋានបានឃើញរូបថតនោះដែរ តែនិយាយថាជារឿងច្នៃប្រឌិត ព្រោះខ្មោច បិសាចមិនដែលមានអ្នកណាថតរូបជាប់ទេ សូម្បីអាមេរិកក៏មិនទាន់ធ្វើបានផង។ ក្នុងរយៈពេលប៉ុន្មានថ្ងៃនេះ នៅក្រុងកំពតមានការនិយាយជាហូរហែអំពីហេតុការណ៍ដែលយុវជនម្នាក់មកលេងផ្ទះគូដណ្ដឹងរបស់ខ្លួន ហើយថតជាប់ជំនាងផ្ទះ ខណៈពេលកំពុងដេកក្នុងអង្រឹងតែឯង ហើយទាញទូរស័ព្ទថតសាកមើល។ ការនិយាយនោះ អ្នកខ្លះមានទាំងរូបថតបង្ហាញជាភស្ដុតាងទៀតផង។ តាមរយៈរូបថតឃើញថា ការថតធ្វើឡើងនាពេលព្រលប់ ដោយជាប់រូបអង្រឹងប្រហែល៤០ភាគរយហើយខ្សែអង្រឹងបានគងលើស្មាឆ្វេងនៃស្រីវ័យក្មេងពាក់អាវសទម្លាក់សក់ដ៏វែងអន្លាយមកមុខផ្នែកខាងស្ដាំ។ ប៉ុន្ដែរូបដែលអះអាងថាជាជំនាងផ្ទះនោះមានត្រឹមតែមួយកំណាត់ខ្លួនប៉ុណ្ណោះ មិនឃើញផ្នែកខាងក្រោមទេ។ អ្នកភូមិ ក៏ដូចជាអ្នករត់ម៉ូតូឌុបភាគច្រើនដែលជឿលើរឿងរ៉ាវនេះ បានកោតសរសើរចំពោះបច្ចេកវិទ្យា និងសម្ភារៈដែលកាន់តែទំនើប អាចថតឃើញនូវអ្វីដែលស្ថិតក្នុងភាពអាថិ៍កំបាំងតាំងពីយូរលង់មកហើយនោះ។ ជុំវិញរឿងរ៉ាវនេះ ស៊ីម ស្រីទូច ភេទស្រី អាយុ ៣០ឆ្នាំ ទីលំនៅភូមិត្រពាំងធំ ឃុំត្រពាំងធំ ស្រុកទឹកឈូ ខេត្ដកំពត ជាម្ចាស់ផ្ទះកើតហេតុ បានរៀបរាប់ថា កាលពីប្រហែលមួយសបា្ដហ៍មុន គូដណ្ដឹងរបស់ប្អូនស្រីខ្លួនបានមកលេងដោយសម្រាកបួនទៅប្រាំយប់។ នាយប់ថ្ងៃទី៩ ខែសីហា ឆ្នាំ២០១២ ដែលជាយប់ទីបី នៅម៉ោងប្រហែលជាង៧ ពេលអ្នកក្នុងផ្ទះកំពុងអង្គុយមើលទូរទស្សន៍ ស្រាប់តែអនាគតប្អូនថ្លៃឈ្មោះ វិចិត្រ បានរត់ចេញពីអង្រឹងកាន់ទូរស័ព្ទសំដៅចូលផ្ទះ ហើយនិយាយថា ថតជាប់រូបស្រីចម្លែក។ លុះពេលមើលក្នុងទូរស័ព្ទស្រាប់តែឃើញរូបស្រីភ្នែកជាំ ឈរទម្លាក់សក់នៅសសរផ្ទះក្បែរអង្រឹងមែន ក៏មានការភ័យខ្លាចគ្រប់ៗគ្នា។ មិនយូរប៉ុន្មាន អ្នកជិតខាងបាននាំគ្នាមកចោមរោមមើល និងខ្លះសុំបាញ់រូបនោះចូលទូរស័ព្ទពួកគេជាច្រើននាក់ទៀតផង។ ស៊ីម ទូចបន្ដថា ស្ទើរពេញមួយយប់អ្នកក្នុងផ្ទះដេកមិនលក់ទេ រហូតព្រឹកឡើងបាននាំគ្នាទៅវត្ដជុំក្រៀលដើម្បីនិមន្ដព្រះសង្ឃស្រោចទឹកឱ្យ ហើយនៅទីនោះតាអាចារ្យប្រាប់ថា កុំភ័យខ្លាចអី នេះជាជំនាងផ្ទះតាមការពារអ្នកទាំងអស់គ្នាទេ។ ពាក់ព័ន្ធនឹងហេតុការណ៍នេះ លោកម៉ៅ ចាន់សេរីរ័ត្ន នាយប៉ុស្ដិ៍ប៉ូលិសរដ្ឋបាលឃុំត្រពាំងធំ បញ្ជាក់ថា ក្នុងមូលដ្ឋានរបស់លោកមិនមានហេតុការណ៍បែបនោះកើតឡើងទេ ជាពាក្យចចាមអារ៉ាមប៉ុណ្ណោះ។ ថ្មីៗនេះពេលលោកជួបជាមួយមេប៉ុស្ដិ៍រដ្ឋបាលឃុំត្រពាំងសង្កែ ក៏មានការសួរនាំរឿងនេះដែរ លុះលោកឱ្យកូនចៅទៅស៊ើបសួរនៅម្ដុំដែលថាកើតរឿងរ៉ាវក៏មិនបានឮនូវការនិយាយអ្វីទាំងអស់។ បើសិនជាពិតមែន ខាងឃុំនឹងរាយការណ៍ទៅលោកអភិបាលស្រុក ហើយលោកក៏ធ្វើរបាយការណ៍ទៅលោកអធិការដែរ។ ដោយឡែកលោកយាវ សឿន មេឃុំត្រពាំងធំបានឱ្យដឹងថា ចំពោះរូបថតនោះលោកបានឃើញដែរ ព្រោះមានគេយកមកបង្ហាញដល់សាលាឃុំ តែលោកជឿថា នោះជាការច្នៃប្រឌិតប៉ុណ្ណោះ។ រូបថតនោះជាមនុស្សស្រីសក់វែង មិនឃើញដល់ជើងទេ។ ធម្មតាមានតែសាកសពប៉ុណ្ណោះដែលថតជាប់។ តាំងពីដូនតាមក ខ្មោច បិសាច ឬជំនាងផ្ទះមិនអាចអ្នកណាថតជាប់ទេ សូម្បីអាមេរិកាំងក៏មិនទាន់ធ្វើបានផង។ លោកអាយុជាង៦០ឆ្នាំហើយ មិនដែលឃើញអ្នកណាថតបានទេ វាជាការកែច្នៃរូបភាព ហើយបាញ់បន្ដឱ្យគ្នាមើលលេង។ កែវ វិចិត្រ ភេទប្រុស អាយុ ២៥ឆ្នាំ ទីលំនៅខណ្ឌសែនសុខ រាជធានីភ្នំពេញ បានបញ្ជាក់តាមទូរស័ព្ទនាព្រឹកថ្ងៃទី១៤ ខែសីហា ឆ្នាំ២០១២ នេះថា ថ្វីត្បិតតែខ្លួនមានមុខរបរជាអ្នកធ្វើនាមប័ណ្ណ ច្នែម៉ូដផ្សេងៗក្ដី តែសម្រាប់រូបនោះគឺខ្លួនថតបានពិតៗ ដោយឥតឌីសាញ (Design) អ្វីទេ។ នាពេលនោះខ្លួនកំពុងដេកក្នុងអង្រឹង ចៃដន្យក៏ទាញទូរស័ព្ទដែលទើបនឹងទិញប្រហែលជិតកន្លះខែមកថតសំដៅសសរផ្ទះសាកមើល។ ពេលថតលើកដំបូង ទូរស័ព្ទមិនបែកភ្លើងក៏ថតម្ដងទៀត។ លុះបើកមើលស្រាប់ តែឃើញរូបស្រីម្នាក់ឈរនៅក្រោមខ្សែអង្រឹងក្បែរសសរផ្ទះ ធ្វើឱ្យខ្លួនមានការភ័យខ្លាចក៏រត់ចូលទៅបង្ហាញគូដណ្ដឹង និងសាច់ញាតិ ទើបមានការភ្ញាក់ផ្អើលទាំងយប់។ ព្រោះតែរឿងនេះ ព្រឹកឡើងបងប្អូនខាងគូដណ្ដឹងក៏នាំទៅឱ្យលោកស្រោចទឹកនៅឯវត្ដមួយ តែខ្លួនមិនស្គាល់ថាឈ្មោះវត្ដអ្វីទេ ដែលនៅទីនោះតាអាចារ្យប្រាប់ថាស្រីនេះជាជំនាងផ្ទះ គេមិនធ្វើបាបអ្វីឡើយ។ ខ្លួនគេផ្ទាល់ (វិចិត្រ ) គិតថាអាចមានកំហុសខ្លះៗដែរព្រោះមកសម្រាកផ្ទះគូដណ្ដឹងប៉ុន្មានដងហើយមិនបានអុចធូបសុំសេចក្ដីសុខពីម្ចាស់ទឹកម្ចាស់ដីសោះ។ ធម្មតាខ្មែរយើងតាំងពីបុរាណមកតែងតែមានជំនឿ ហើយស័ក្ដិសិទ្ធិជាក់ច្បាស់ទៀតផង។ កន្លងមកនៅកន្លែងផ្សេងៗតែងឮសំឡេង ឬឃើញក្នុងក្ដីស្រមៃ ដូចជាពេលដេកមិនទាន់លក់ជាដើម តែលើកនេះខ្លួនបានឃើញដោយសារយកទូរស័ព្ទថតលេងប៉ុណ្ណោះ។ តាមពិតខ្លួនគ្រាន់តែចង់ឱ្យអ្នកក្នុងផ្ទះរបស់គូដណ្ដឹងបានឃើញហេតុការណ៍តែប៉ុណ្ណោះ ដោយមិននឹកស្មានថារូបនោះត្រូវគេចែកចាយរហូតដឹងដល់អ្នកសារព័ត៌មានសោះ ហើយឥឡូវនេះរវល់នឹងទទួលទូរស័ព្ទព្រោះតែការសួរបញ្ជាក់។ ដូច្នេះគ្រាន់តែប្រាប់ដល់មនុស្សទាំងអស់ថា រូបថតនេះគឺថតបានដោយពិតៗ មិនបានឌីសាញទេ៕
ប្រភព cen.com.kh
