ភ្នំពេញ ៖ រថយន្តដឹក ស៊ីម៉ងត៍ មួយគ្រឿង បានបុករបាំងថ្ម ពុះចែកទ្រូង បាក់អស់៣ កង់ កាលពីវេលាម៉ោង១១ ថ្ងៃទី៣១ ខែមីនា ឆ្នាំ២០១៣ នៅមុខសាលាពេទ្យ តាមបណ្ដោយ ផ្លូវ២៧១ សង្កាត់ទំនប់ទឹក ខណ្ឌចំការមន ហើយរថយន្តព្យាយាម បើករត់គេច ទៅជិតដល់ សាលាបឋមសិក្សា ហ៊ុន នាង ផ្សារផ្សារ ដើមថ្កូវ ទើបសមត្ថកិច្ច ឃាត់ជាប់។
តាមសាក្សី ដែលឃើញហេតុការណ៍ខាងលើនេះ បាន និយាយថា មុនពេលកើតហេតុ រថយន្តបង្ក បើកក្នុងទិសដៅពីត្បូងទៅ ជើង ដោយបានបើក យ៉ាងលឿន ខណៈមកដល់ចំណុច កើតហេតុ ក៏រេចង្កូតបុកចំបង្គោលផ្លាក របាំងថ្មចែកទ្រូង ផ្លូវពេញទំហឹងតែម្ដង បណ្ដាលឲ្យ របាំងថ្មចែកទ្រូង ចំនួន បីកំណាត់ ត្រូវរងការ ខូចខាតទាំងស្រុង ។
សាក្សីបន្តថា ក្រោយពីកើតហេតុ រថយន្តបង្កបានបត់ក្បាលត្រឡប់ ថយក្រោយបើក រត់គេចខ្លួន តែត្រូវសមត្ថកិច្ច តាមចាប់បាន ។ ភ្លាមៗនោះ សមត្ថកិច្ច មូលដ្ឋានបាន សហការជាមួយ សមត្ថកិច្ចជំនាញ យករថយន្តបង្កទៅរក្សាទុកនៅ សាលារាជធានីភ្នំពេញ ដើម្បីរងចាំថៅកែ ស៊ីម៉ង់ត៍ សញ្ញារូបភ្នំ ចូលទៅដោះ ស្រាយសំណងជាក្រោយ ៕
ដោយ៖ ដើមអម្ពិល
