កំពង់ឆ្នាំង: គូទំនាស់ក្នុងវង់ផឹក ជាមួយគ្នាយកកែវស្រាវ៉ៃចំកណ្ដាលក្បាលពេញមួយទំហឹង ក្នុងរឿងឌឹដងពាក្យសម្ដី ពេលកំពុងផឹក។ យុវជនម្នាក់បានរងរបួស ឈាមស្រោចក្រហមច្រាលពេញខ្លួន ត្រូវមិត្ដភក្ដិដឹកមកកាន់មន្ទីរពេទ្យបង្អែកខេត្ដកំពង់ឆ្នាំង កាលពីវេលាម៉ោង៦និង ១០នាទី ព្រលប់ថ្ងៃទី២៩ ខែមីនា ឆ្នាំ២០១៣។ ប៉ូលិសបាន អោយដឹងថា ជនរងគ្រោះដែលត្រូវគេវ៉ៃបែកក្បាលនេះ ឈ្មោះ យាវ កុសល អាយុ២៥ឆ្នាំ មានទីលំនៅក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង។ ជនរងគ្រោះបានមកជួយរៀបចំរោងការមិត្ដភក្ដិ ឈ្មោះ ឌិត រ៉ាវិត នៅក្នុងភូមិជាមួយគ្នា ក្នុងកន្លែងកើតហេតុ ភូមិទួលក្រឡាញ់ សង្កាត់កំពង់ឆ្នាំង។ នៅពេលល្ងាច ក្រោយពីបានរៀបចំហើយ ម្ចាស់ដើមការបានដាក់ស្រាអោយផឹក ហើយក្នុងពេលកំពុងផឹកនោះជនរងគ្រោះ និងជនបង្ក ឈ្មោះប៉ុម ចាន់បុរី បានឌឺដងសម្ដីដាក់គ្នាបង្កទៅជាជម្លោះ ហើយក្នុងពេលនោះឈ្មោះប៉ុម ចាន់បូរី បានយកកែវស្រាដែលកំពុងផឹក វ៉ៃទៅលើជនរងគ្រោះឈ្មោះ យាវ កុសល ពេញមួយទំហឹង ត្រូវចំកណ្ដាលក្បាល បណ្ដាលអោយបែកក្បាលឈាមហូរស្រោយពេញខ្លួន។ ក្រោយពីវ៉ៃជនរងគ្រោះហើយ ជនដៃដល់បានរត់គេចខ្លួនបាត់៕
ប្រភពៈ CEN
