មុននេះមានព័ត៌មានថា តារាសិចស៊ី ដើមទ្រូងធំ កុល ដាវី មានស្នេហាជាមួយលោកថៅកែកូរ៉េ ហើយបុរសតាមនាងស្អិតដូចតុកកែនោះ បានប្រចណ្ឌដាវី ជាខ្លាំង។ ប៉ុន្តែ ថ្មីៗនេះ ស្រាប់តែមានដំណឹងលេចឮគួរឱ្យភ្ញាក់ផ្អើលថា កុល ដាវី កំពុងសាងស្នេហ៍យ៉ាងសម្ងាត់ ជាមួយតារាចម្រៀងសាន់ដេ លោកសុខ រក្សា ទៅវិញ។ កុល ដាវី និងសុខ រក្សា បានចេញមុខបកស្រាយរួមគ្នា ដោយអ្នកទាំង២ បានបដិសេធដំណឹងស្នេហ៍នេះ...។
ព័ត៌មានដែលកំពុងតែល្បីសុសសាយពេញចង្កោមអ្នកសិល្បៈ និងមជ្ឈដ្ឋានទូទៅនោះ គឺធ្លាយរឿងថា កុល ដាវី តារាស្រីសិចស៊ី ដើមទ្រូង ទ្រលុកទ្រលន់ កំពុងមានទំនាក់ទំនងស្នេហាយ៉ាងសម្ងាត់ ជាមួយអតីតតារាចម្រៀងហង្សមាស និងបច្ចុប្បន្ន ជាតារាសាន់ដេ លោកសុខ រក្សា។
តាមប្រភពបានទម្លាយឱ្យដឹងថា ទំនាក់ទំនងស្នេហាកុល ដាវី និងសុខ រក្សា បានឡើងកម្តៅគគុក បន្ទាប់ពីតារា១គូនេះ វិលត្រឡប់មកពីសម្តែង នៅប្រទេសកាណាដា រងើកស្នេហ៍ចាប់ផ្តើមឆាបឆេះឡើង ដោយ តារាទាំង២ ស្រលាញ់ និងប្រចណ្ឌ គ្នាខ្លាំងណាស់ ដែលនៅក្នុង សិល្បៈ នរណាក៏ដឹងគ្រប់ៗគ្នាដែរ។
កុល ដាវី ហាក់ដូចជាមានការភ័យខ្លាចក្នុងការលាតត្រដាង ស្នេហាថ្មីនេះ ដោយលើកហេតុផលថា ខ្លាចអ្នកដែលតាមស្រលាញ់ នាងដែរ គេអន់ចិត្ត។
ដាវី បាននិយាយប្រាប់កាលពីថ្ងៃទី១៨ មីនា ថា “និយាយទៅ ខ្ញុំក៏ឆ្ងល់ដែរបង! ហេតុអីមួយរយៈហ្នឹង គេនាំគ្នានិយាយតែខ្ញុំជាមួយគាត់ ហើយបើនៅតែអ៊ីចឹង ខ្ញុំប្រេះទ្រូងងាប់ហើយ។ តាមពិត ខ្ញុំបានស្គាល់បងរក្សា តាំងពីនៅតូចៗ គាត់ស្រាតខោ សក់ក្រញាញ់ ព្រោះតែផ្ទះនៅទល់មុខគ្នា ឯខេត្តបាត់ដំបង គ្រាន់តែពេលពួកយើង ចូលសិល្បៈ ពីមុនមិនសូវបានស្និទ្ធស្នាលគ្នាទេ ទើបតែបានទៅសម្តែង នៅប្រទេសកាណាដា ហ្នឹង រាងជិតស្និទ្ធគ្នាជាងមុន”។
ដាវី បញ្ជាក់ថា “ឥឡូវខ្ញុំពិបាកណាស់ ដល់ពេលគេម៉ៃថា យើង មានស្នេហាអីជាមួយគ្នាហ្នឹង ហើយការនិយាយបែបនេះ ធ្វើឱ្យប៉ះពាល់អ្នកដែលស្រលាញ់ខ្ញុំដែរ អ៊ីចឹងខ្ញុំចង់ប្រាប់ថា រវាងខ្ញុំ និង បងរក្សា គ្រាន់តែជាអ្នកជិតដិតរាប់អានគ្នាតែប៉ុណ្ណឹង”។
ដោយឡែក សុខ រក្សា បានច្រឡោតខឹង នៅពេលត្រូវសាកសួរ ពីរឿងនេះ ហើយតារាសាន់ដេ រូបនេះ បាននិយាយដោយលឿន និងសំឡេងហាក់មិនសប្បាយចិត្តថា “ពីណាមកនិយាយអី ផ្តេសផ្តាសអ៊ីចឹង! ខ្ញុំចង់តែរកមុខអ្នកនិយាយហ្នឹងតើ! ឥឡូវខ្ញុំចង់ប្រាប់ថា កាលទៅកាណាដា ហ្នុង មិនមែនតែ ២នាក់ឯណា មាន ម្ចាស់Sponsor ក៏នៅហ្នុងដែរ”។
រក្សា បានបន្តថា “ខ្ញុំនិងអាវី មិនអាចទៅជាស្នេហាអីទេ ហើយចុះម៉េចបានជាអាវី គេបណ្តើរបុរសៗជាច្រើនក្នុងសិល្បៈ ម៉េចក៏មិនសង្ស័យផង មកម៉ៃតែខ្ញុំម្នាក់ឯង?”។
ចំណែកប្រភពមួយទៀតថា ពេលនេះ កុល ដាវី និងសុខ រក្សា កំពុងត្រៀមស្ពាយបង្វេចទៅច្រៀងនៅអាមេរិក រួមគ្នា នៅខែមេសា នេះ ហើយពួកគេបានចូលធ្វើតេស្តនៅស្ថានទូតអាមេរិក កាលពីថ្ងៃទី ២០ មីនា ដោយប្រភពនោះ ថា ដោយសារតែស្រសាញ់គ្នាខ្លាំងពេក ទើបទាំងកុល ដាវី និងសុខ រក្សា តាំងចិត្តថា បើមានម្នាក់សម្ភាសន៍ធ្លាក់ ពួកគេមិនទៅទាំង២ តែម្តង។
កុល ដាវី បាននិយាយថា អ្នកនិយាយនោះ ជាអ្នកច្រណែន ឈ្នានីសនាង ម៉្យាងចង់ឱ្យនាងបែកពីអ្នកកំពុងស្រលាញ់ ទើបផ្គូផ្គងជាមួយសុខ រក្សា។
កុល ដាវី ប្រាប់ថា “ទោះជាខ្ញុំធ្លាក់ ក៏បងរក្សា ទៅហើយ ទោះជាបងរក្សា ធ្លាក់ ក៏ខ្ញុំទៅ អត់មានបញ្ហាអីដូចគេថាទេ”។
ដោយឡែក សុខ រក្សា បានតាំងចិត្តថា “ខ្ញុំទៅច្រៀងនៅបរទេស ដើម្បីរកលុយទិញផ្ទះ ឬឡានជិះ មិនទៅខ្វល់រឿងទៅទាំងគូ ឬ មិនគូទេ ព្រោះក្រៅពីកុល ដាវី ក៏មានអ្នកនាងអឿន ស្រីមុំ លោក ខាត់ ចំរើន ទៅដែរ។ ការលេចឮថា ខ្ញុំនិងអាវី ទាក់ទងគ្នាហ្នឹង ខ្ញុំភ័យណាស់ ព្រោះអត់ដឹងថា អាវី មានអ្នកណាស្រលាញ់ខ្លះ ហើយខ្ញុំនៅផ្លូវភ្លឺ គេនៅផ្លូវងងឹត” ៕
ប្រភពៈ អង្គរធំមេឌែ
