ខេត្តកោះកុង ៖ កាលពីថ្ងៃទី២៥ មីនា កម្លាំងការិយាល័យកណ្តាលនគរបាលយុត្តិធម៌នៃស្នងការដ្ឋាននគរបាល ខេត្ត បានសហការជាមួយសមត្ថកិច្ចនគរបាលថៃ ចាប់ខ្លួនជនសង្ស័យម្នាក់ឈ្មោះលុន វែង ភេទប្រុស អាយុ២៩ឆ្នាំ តាមរយៈការផ្តល់អត្តសញ្ញាណ និងរូបថតជនសង្ស័យជាមុនទៅឱ្យសមត្ថកិច្ចថៃ ។ ជនសង្ស័យរូបនេះបានប្រព្រឹត្តអំពើមនុស្សឃាតទៅលើប្រពន្ធរបស់ ខ្លួន ដោយយកដុំថ្មវាយបែកក្បាលពីខាងក្រោយ កាលពីថ្ងៃទី២៣ តុលា ឆ្នាំ២០១២ នៅក្នុងខេត្តសៀមរាប ។
បន្ទាប់មកគេលួចរត់គេចខ្លួនទៅក្នុងស្រុកថៃ ដោយលាក់ខ្លួនក្នុងឃុំខ្លងស្រុន ស្រុកខ្លងយ៉ៃ ខេត្តត្រាត តាំងពីពេលនោះមក ។ លុះមកដល់ថ្ងៃទី២៥ មីនា ទើបសមត្ថកិច្ចថៃចាប់ខ្លួនជនសង្ស័យរូបនេះបាន រួចកម្លាំងកណ្តាលនគរបាលយុត្តិធម៌ខេត្តកោះកុងបានទៅនាំខ្លួនយក មកកម្ពុជាវិញ ។លោកវរសេនីយ៍ទោ ឃឹម សាណេ ស្នងការរងទទួលផែនព្រហ្មទណ្ឌបានបញ្ជាក់ថា តាមកិច្ចសហការរវាងកម្លាំងនគរបាលខេត្តទាំង២ ខេត្តកោះកុង និងខេត្តសៀមរាប រួមនឹងកម្លាំងនគរបាលភូមិន្ទថៃ យើងដឹងថា ជនសង្ស័យរូបនេះ (លុន វែង) បានប្រព្រឹត្តអំពើឃាតកម្មចំនួន២លើកកន្លងមកហើយ ។
លើកទី១ កាលពីថ្ងៃទី១១ សីហា ឆ្នាំ២០០៥ នៅភូមិរកា ឃុំខ្ពប ស្រុកស្អាង ខេត្តកណ្តាល ។ លើកទី២ បន្ទាប់ពីគេចខ្លួនពីខេត្តកណ្តាលមករស់នៅក្នុងខេត្តសៀមរាប នៅថ្ងៃទី២៣ តុលា ឆ្នាំ២០១២ ឈ្មោះលន់ វែង បានសម្លាប់ប្រពន្ធរបស់ខ្លួន ជាបទល្មើសទី២ រួចរត់គេចខ្លួនទៅស្រុកថៃ រហូតដល់ថ្ងៃចាប់ខ្លួនបានតែម្តង ។
លោកស្នងការរង ឃឹម សាណេ បានបញ្ជាក់ទៀតថា បន្ទាប់ពីជនសង្ស័យត្រូវបាននាំខ្លួនចេញពីប្រទេសថៃមកកាន់ស្នង ការដ្ឋាននគរបាលខេត្តកោះកុង ក៏បានទំនាក់ទំនងប្រគល់ជនសង្ស័យជូនសមត្ថកិច្ចខេត្តសៀមរាប តាមដីកាបង្គាប់នាំខ្លួនលេខ១០៦២ ចុះថ្ងៃទី២៥ មីនា ឆ្នាំ២០១៣ របស់អយ្យការអមសាលាដំបូងខេត្តសៀមរាប នារសៀលថ្ងៃទី២៦ មីនា ឆ្នាំ២០១៣ តាមនីតិវិធីតុលាការ។
លោកស្នងការរង ឃឹម សាណេ បានបញ្ជាក់ទៀតថា ការសហការបង្ក្រាបជនល្មើសឆ្លងដែនបែបនេះបាន គឺដោយសារការអនុវត្តតាមបញ្ជារបស់លោកឧត្តមសេនីយ៍ត្រី សំឃីត វៀន ស្នងការនគរបាល ជាអ្នកចង្អុលបង្ហាញផងដែរ ។ ជាពិសេស កម្លាំងក្រោមឱវាទគឺលោកវរសេនីយ៍ទោ ឡាយ ម៉េងឡាំង នាយការិយាល័យព្រហ្មទណ្ឌកម្រិតស្រាល ដែលបានដឹកនាំកម្លាំងចំនួន៧នាក់ ទៅសហការទទួលយកជនសង្ស័យពីក្នុងទឹកដីថៃមក និងលោកវរសេនីយ៍ទោ សុខ ញ៉ នាយការិយាល័យព្រហ្មទណ្ឌកម្រិតធ្ងន់ បានខិតខំសហការជាមួយសមត្ថកិច្ចខេត្តសៀមរាប និងខេត្តកណ្តាល ដើម្បីស្រាវជ្រាវរកសាវតារជាតិរបស់ជនសង្ស័យ ដើម្បីអនុវត្តការងារនេះរហូតទទួលបានលទ្ធផលជាវិជ្ជមាន ៕
