ខេត្ដ្កណ្ដាល ៖ រថយន្ដដឹកខ្សាច់៦គ្រឿងដែលហូរទឹកនិងជ្រុះខ្សាច់រាយប៉ាយពាសពេញ ផ្លូវជាតិធ្វើឱ្យប៉ះពាល់ដល់អ្នកដំណើរ ត្រូវមន្ដ្រីប៉ូលិសក្រុងតាខ្មៅប្រើធម៌ក្ដៅចាប់ជាបន្ដបន្ទាប់ កាលពីល្ងាចថ្ងៃទី២៥ មីនា ខណៈបើកឆ្លងកាត់ក្រុងតាខ្មៅ យកមកកាន់អធិការដ្ឋានដើម្បីអប់រំ និងផាកពិន័យតាមផ្លូវច្បាប់ ។
លោកឡាង លន់ អធិការរងក្រុងតាខ្មៅទទួលផែនសណ្ដាប់ធ្នាប់និងចរាចរណ៍ឱ្យដឹងថា ដោយអនុវត្ដតាមបទបញ្ជាគណៈបញ្ជាការឯកភាពក្រុងតាខ្មៅ និងដោយមានការបញ្ជាផ្ទាល់ពីលោកអធិការកម្លាំងប៉ូលិសចរាចរ ក្រុងតាខ្មៅ បានប្រើធម៌ក្ដៅស្ទាក់ចាប់រថយន្ដដឹកខ្សាច់ចំនួន៦គ្រឿងដែលហូរ ទឹកនិងជ្រុះខ្សាច់រប៉ាត់រប៉ាយពាសពេញលើផ្លូវជាតិ ។ រថយន្ដដឹកខ្សាច់ទាំងនោះ គឺផ្ទុកពេញហៀរនិងមិនគ្របតង់ បើកតាមផ្លូវជាតិឆ្លងកាត់ក្រុងតាខ្មៅ កាលពីល្ងាចថ្ងៃទី២៥ មីនា ។
ការជ្រុះខ្សាច់និងហូរទឹកលើថ្នល់នេះបានធ្វើ ឱ្យប៉ះពាល់យ៉ាងធ្ងន់ធ្ងរដល់អ្នកដំណើរតាមផ្លូវ ហុយចូលភ្នែក ច្រមុះប៉ះពាល់សុខភាពមនុស្សនិងងាយបង្កឱ្យមានគ្រោះថ្នាក់ចរាចរណ៍ ជាយថាហេតុ ដូច្នេះសមត្ថកិច្ចត្រូវតែប្រើធម៌ក្ដៅទៅលើរថយន្ដទាំងនោះ ចាប់យកមកអប់រំ និងផាកពិន័យតាមផ្លូវច្បាប់ឱ្យរាងចាល ។
គួរបញ្ជាក់ថា ក្នុងចំណោមរថយន្ដទាំងនោះមានរថយន្ដខ្លះធ្លាប់ត្រូវសមត្ថកិច្ច ចាប់យកមកអប់រំនិងផាកពិន័យពេលកន្លងមក ។ទោះជាបែបណា សមត្ថកិច្ចនៅតែបន្ដអនុវត្ដផែនការនេះឱ្យដូចភ្លៀងរលឹម ប្រយោជន៍រក្សាសណ្ដាប់ធ្នាប់បញ្ចៀសគ្រោះថ្នាក់ចរាចរណ៍ និងដើម្បីសោភ័ណភាពតាមដងផ្លូវក្នុងទីក្រុង ៕
កោះសន្តិភាព
មន្ដ្រីប៉ូលិសក្រុងតាខ្មៅប្រើធម៌ក្ដៅលើរថយន្ដដឹកខ្សាច់ជ្រុះរាយប៉ាយលើផ្លូវ
