ខេត្តកំពង់ឆ្នាំង ៖ បុរសជនជាតិខ្មែរអ៊ិស្លាម ២នាក់បានស្លាប់នៅនឹងកន្លែង ខណៈពេលជិះម៉ូតូបុកគ្នាជាមួយរថយន្តបាឡែន កាលពីវេលាម៉ោង៨និង១០នាទីយប់ថ្ងៃទី២៥ មីនា នៅតាមបណ្តោយផ្លូវជាតិលេខ៥ ត្រង់ចន្លោះគីឡូម៉ែត្រលេខ៥៥ និងលេខ៥៦ ស្ថិតក្នុងភូមិច្រកល្មៀត ឃុំអូរឫស្សី ស្រុកកំពង់ត្រឡាច ។ មន្ត្រីប៉ូលិសចរាចរខេត្តបាននិយាយថា រថយន្តបាឡែន ពណ៌ទឹកប្រាក់ ជារថយន្តរបស់បុគ្គលិកធនាគារ ចំណែកភាគីម្ខាងជិះម៉ូតូម៉ាកហុងដាណៃ អត់ស្លាកលេខ ជិះគ្នា២នាក់បើកដោយឈ្មោះយ៉ាន សុខ អាយុ៤៥ឆ្នាំ និងអ្នកជិះពីក្រោយឈ្មោះសុខ ជុះ អាយុ៥០ឆ្នាំ ទាំង២នាក់ជាជនជាតិខ្មែរអ៊ិស្លាម រស់នៅភូមិព្រៃពីស ឃុំជ្រេស ស្រុកកំពង់ក្រឡាច ។ ប្រភពដដែលបានបន្តថា មុនពេលកើតហេតុរថយន្តបាឡែនបានធ្វើដំណើរពីជើងទៅត្បូងក្នុងល្បឿនលឿន លុះមកដល់ចំណុចកើតហេតុក៏មានម៉ូតូម៉ាកហុងដាណៃ បើកមកបញ្ច្រាសទិសគ្នាមកដល់បានបត់ឆ្វេង ហើយក៏បត់ត្រឡប់មកខាងស្តាំវិញ ក៏ត្រូវរថយន្តបុកពេញទំហឹង បណ្តាលឱ្យអ្នកជិះម៉ូតូស្លាប់ទាំង២នាក់ ចំណែកម៉ូតូខ្ទេចទាំងស្រុងតែម្តង៕
ប្រភព : កោះសន្តិភាព
