ភាពព្រៃផ្សៃប្រធានក្រុមហ៊ុនស្រាបៀរលីអូប្លន់ដីប្រជាជន

ខេត្តព្រះសីហនុ ៖ សមត្ថកិច្ចចម្រុះដឹកនាំដោយ ប្រាក់ ស៊ីហារ៉ា អភិបាលរងខេត្ត និងមានការចូលរួមពី ប៊ូ ប៊ុនហាង ព្រះរាជអាជ្ញាអមសាលាដំបូងខេត្ត ព្រះរាជអាជ្ញារង ព្រមទាំងកម្លាំងប្រដាប់អាវុធ៣ប្រភេទជាង១០០នាក់និងគ្រឿហចក្រធំៗបានចុះអនុវត្តសាលក្រមរុះរើផ្ទះប្រជាពលរដ្ឋ១៤ខ្នងស្មើ១៧គ្រួសារនៅចំណុចពយចម្រាំង ភូមិកែវផុស ឃុំកែវផុស ស្រុកស្ទឹងហាវ កាលពីវេលាម៉ោង៦ព្រឹក ថ្ងៃទី៥ មីនា ២០១៣ នេះ បន្ទាប់ពីចាញ់ក្តីជាមួយ ឧកញ៉ា ជៀម ផែន ជាថៅកែស្រាបៀរលីអូ។ ការឈូសឆាយលំនៅឋានប្រជាពលរដ្ឋទាំង១៤ខ្នងស្មើ១៧គ្រួសារ រស់នៅចំណុចខាងលើនេះ គេប្រើគ្រឿងចក្រ២គ្រឿង គឺអេស្កាវ៉ាទ័រ១ និង អាប៊ុល្ល័រហ្ស័រ១ បានសម្រេចជោគជ័យ នៅវេលាម៉ោងជាង១១ថ្ងៃត្រង់ ថ្ងៃដដែល ហើយប្រជាពលរដ្ឋបានស្រែកយំទ្រហឹងថា អយុត្តិធម៌ខ្លាំងណាស់ ចំពោះសាលក្រម របស់សាលាដំបូងខេត្តព្រះសីហនុ ដែលកាត់ក្តីឱ្យឧកញ៉ា ជៀម ផែន ថៅកែស្រាបៀរលីអូឈ្នះលើរឿងដីធ្លីរបស់ពួកគាត់ ហើយសមត្ថកិច្ចចម្រុះ បានប្រើគ្រឿងចក្រឈូសឆាយ ផ្ទះសម្បែង និងដំណាំរបស់ពួកគាត់រាបដល់ដីដែលពួកគាត់បានមករស់នៅ តាំងពីឆ្នាំ១៩៧៩មកម្លេះ ។