រាជធានីភ្នំពេញ ៖ កម្លាំងសមត្ថកិច្ចបូលិសខណ្ឌដង្កោបានធ្វើការឃាត់ខ្លួនជនសង្ស័យ ជួញដូរគ្រឿងញៀនបាន៣នាក់ នៅវេលាម៉ោង៨ព្រឹកថ្ងៃទី២៨ មីនា ២០១៣ នៅក្នុងភូមិព្រៃទីទុយ សង្កាត់ព្រៃ.ស ខណ្ឌដង្កោ ក្នុងខណៈពេលពួកគេធ្វើសកម្មភាពជួញដូរគ្រឿងញៀន។
ជនសង្ស័យទាំង៣នាក់នោះ ១-ឈ្មោះរ៉េត កុសល ភេទប្រុស អាយុ១៧ឆ្នាំ ២-ឈ្មោះជ័យ សាវ៉ាត ភេទប្រុស អាយុ៣២ឆ្នាំ និង៣-ឈ្មោះផល វណ្ណា ភេទប្រុស អាយុ២១ឆ្នាំ ហើយពួកគេទាំង៣នាក់ខាងលើមានទីលំនៅបុរីសន្តិភាព២ ភូមិដំណាក់ត្រយឹង សង្កាត់ចោមចៅ ខណ្ឌពោធិ៍សែនជ័យ ។
សមត្ថកិច្ចបានឲ្យដឹងទៀតថា ឈ្មោះរ៉េត កុសល គឺជាជនសង្ស័យជួញដូរគ្រឿងញៀន ព្រោះនៅមុនពេលកើតហេតុជននោះបានយកគ្រឿងញៀនប្រភេទម៉ាទឹកកក១កញ្ចប់តូច ទៅលក់ឱ្យឈ្មោះជ័យ សាវ៉ាត ដើម្បីយកទៅលក់បន្តឲ្យឈ្មោះផល វណ្ណា តែពេលនោះជនសង្ស័យឈ្មោះផល វណ្ណា បានប្រាប់ថា ខ្លួនអត់មានលុយទិញនោះទេ។ ដោយសារតែជនទាំងនោះគឺជាមុខសញ្ញាដែលត្រូវជាប់ក្នុងការតាមដានយូរមកហើយនោះ ទើបកម្លាំងសមត្ថកិច្ចចុះទៅធ្វើការឃាត់ខ្លួនជន សង្ស័យនោះបានទាំងសម្បុករួមជាមួយភស្តុតាងគ្រឿងញៀនម៉ាទឹកកក ១កញ្ចប់តូចផងដែរ៕
ប្រភពៈ កោះសន្តិភាព
