ប្រទេសភូមា ៖ អំពើហិង្សានៅក្នុងប្រទេសភូមា បានក្លាយទៅជាចំណុចចោទសួរមួយ អំពីការប្រតិបត្តិគោរពសិទ្ធិមនុស្ស និងសាសនារបស់ប្រជាជនប្រទេសនេះ ដែលទើបបានឆ្លងកាត់របបយោធានិយម។ ប្រេសិតពិសេសរបស់អង្គការសហប្រជាជាតិ លោក វិឆៃណាំបៀរ បានប្រាប់កាសែតភូមាថា អំពើហិង្សាជាតិសាសន៍ និងសាសនាដែលកើតឡើងដ៏ខ្លាំងក្លានៅរយះពេល ប៉ុន្មានថ្ងៃចុងក្រោយនេះ ដែលគួរឲ្យសង្ស័យ ព្រោះហិង្សានេះមិនបានកើតឡើង ដោយសារសហគមន៍ក្នុងតំបន់ខ្លួនគេផ្ទាល់ទេ ហើយបែរជាមានសហគមន៍ដទៃជាអ្នកប្រព្រឹត្តទៅវិញ។
ប្រេសិតអង្គការសហប្រជាជាតិរូបនេះបានទទូចថា រដ្ឋាភិបាលភូមាត្រូវតែស្វែងរកជនប្រព្រឹត្តហិង្សាទាំងនោះ មកផ្តន្ទាទាទោស ហើយព្យាយាមធ្វើឲ្យមានភាពប្រក្រតីឡើងវិញ រវាងអ្នកកាន់សាសនាមូស្លីម និងសាសនាព្រះពុទ្ធ។ អំពើហិង្សាដែលបានកើតឡើងនៅភាគកណ្តាលប្រទេសនៅក្រុងមិតគីឡា បានសម្លាប់មនុស្សយ៉ាងតិច៤០នាក់ ហើយបានដុតបំផ្លាញវត្ត អារាមនិងវិហារម៉ុសអស់ជាច្រើនកន្លែង។ ហិង្សានេះបានរីករាលដាលរហូតដល់ទៅ ៦កន្លែងផ្សេងៗគ្នានៅទូទាំងប្រទេស ។ ប្រេសិតអង្គការសហប្រជាជាតិមានប្រសាសន៍ទៀតថា យ៉ាងតិចណាស់មនុស្ស៩ពាន់នាក់ បានស្វះស្វែងរកទីជម្រកសុវត្ថិភាព ខណៈមនុស្ស២៣នាក់ ត្រូវបានឃុំខ្លួនដោយអាថ៌កំបាំង។ មកដល់ពេលនេះបម្រាមគោចរណ៍បានដាក់ នៅតំបន់ដែលឆាបឆេះហិង្សាទាំងនោះ។
ប្រធានាធិបតីភូមាលោក ថេន សេន បានប្រកាសថា ជនដៃដល់ នឹងមិនអាចរួចខ្លួនបានឡើយ។ អំពើហិង្សានេះ គឺជាលើកទី២ហើយដែលបានកើតឡើងនៅក្នុងប្រទេសអតីតរបបយោធានិយមមួយ នេះ។ កាលពីខែមិថុនា អំពើហិង្សាជាតិសាសន៍ដូចគ្នា នេះបានកើតឡើងនៅរដ្ឋរ៉ាក់ឃីន ភាគខាងលិចប្រទេស ដោយបានសម្លាប់មនុស្សជិត២០០នាក់ ហើយបង្ខំឲ្យមនុស្សរត់រកកន្លែងសុវត្ថិភាពព្រមានជា ១១០០០នាក់។ មកដល់ពេលនេះ សមាគមអាស៊ានមិនបានប្រតិកម្ម ឬក៏ជួយអន្តរាគមន៍អ្វីឡើយ។ ករណីនេះធ្វើឲ្យមានការ ចោទសួរថា តើតួនាទីរបស់សមាគមអាស៊ានធ្វើអ្វីខ្លះ ដើម្បីឲ្យសមាគមក្លាយជាតំបន់អហិង្សា និងមានការអត់អោនគ្នាខាងសាសនា និងជាតិសាសន៍នោះ៕
ប្រភពៈ វត្តភ្នំ
