ស្ទឹងត្រែង: បុរសម្នាក់ជួបនឹងគ្រោះថ្នាក់ចរាចរណ៍ពេលយប់ រួចដើរមកដួលសន្លប់ម្នាក់ឯង គ្មាននណាដឹង លុះព្រឹកឡើងទើបគេប្រទះឃើញ ដឹកទៅភ្នំពេញ ប៉ុន្តែស្លាប់តាមផ្លូវ។ មន្ត្រីចរាចរណ៍ខេត្តស្ទឹងត្រែង បានឱ្យដឹងថា ជនរងគ្រោះឈ្មោះតឿ ធារិទ្ធ អាយុ២៤ឆ្នាំ ស្នាក់នៅភូមិព្រែកសង្កាត់-ក្រុងស្ទឹងត្រែង។ បុរសម្នាក់នេះជួបនឹងគ្រោះថ្នាក់ចរាចរណ៍ កាលពីវេលាម៉ោង១រំលងអាធ្រាត្រឈានចូលថ្ងៃទី២៦ ខែមីនា ឆ្នាំ២០១៣ ចំណុចជិតហាងខារ៉ាអូខេយីហោអស់កង្វល់ ស្ថិតក្នុងភូមិឃុំខាងលើ។ សមត្ថកិច្ចបានបន្តថា ឈ្មោះតឿ ធារិទ្ធ ជិះម៉ូតូសង់កូរ៉េចាស់ គ្មានស្លាកលេខ ទិសដៅពីលិចមកកើតមិនប្រកាន់ស្តាំ។ ចំណែករថយន្ត តូយូតា កាមរី បើកបរដោយឈ្មោះមឿន ជាមន្ត្រីយោធា បើកចេញពីហាងខារ៉ាអូខេអស់កង្វល់ ក្នុងទិសដៅបញ្ច្រាសគ្នា។ ក្រោយពីបុកគ្នាពេញទំហឹង អូសម៉ូតូជាប់ទៅជាមួយរថយន្តចំងាយប្រមាណជាង១០ម៉ែត្រទើបឈប់។ សមត្ថកិច្ច បានទៅដល់កន្លែងកើតហេតុឃើញថា អ្នកជិះម៉ូតូមានកំហុសមិនប្រកាន់ស្តាំ។ អ្នកជិះម៉ូតូឮដូចនោះងើបដើរចេញពីកន្លែងកើតហេតុចំងាយ ៣០០ ទៅ ៤០០ ម៉ែត្ររួចក៏ដួលសន្លប់ក្បែរវាលស្រែម្នាក់ឯង។ លុះដល់ព្រឹកឡើង ទើបគេប្រទះឃើញបុរសដែលជួបគ្រោះថ្នាក់ជិះម៉ូតូបុកគ្នានៅសន្លប់ បាត់ស្មារតី។ ក្រោយមកក្រុមគ្រួសារដឹកទៅកាន់មន្ទីរពេទ្យបង្អែកខេត្តស្ទឹងត្រែង និងបន្តទៅភ្នំពេញ។ ប្រភពព័ត៌មានចុងក្រោយបានឱ្យដឹងថា បុរសជិះម៉ូតូខាងលើបានស្លាប់តាមផ្លូវក្នុងបំណងទៅព្យាបាលជំងឺនៅ ភ្នំពេញ ក្នុងទឹកដីខេត្តក្រចេះ។ ក្រុមគ្រួសារបានដឹកសពមកវិញ ហើយនឹងត្រៀមដាក់បណ្តឹងទៅសមត្ថកិច្ចរកខុសត្រូវ។ រថយន្តដែលបើកបរដោយមន្ត្រីយោធាឈ្មោះមឿន ខាងសមត្ថកិច្ចនគរបាលខេត្តស្ទឹងត្រែង ពុំបានឃាត់ទុកទេ ក្នុងហេតុការណ៍នេះ៕ 
ប្រភពៈ CEN
