ខេត្តតាកែវ ៖ ប្រជាពលរដ្ឋ រួមជាមួយមេភូមិ បានឆោឡោប្តឹងប៉ូលិសរដ្ឋបាលឃុំឱ្យចាប់ខ្លួនបុរសម្នាក់ភ្លាមៗ ដោយចោទប្រកាន់ពីបទប៉ុនប៉ងចាប់ស្ត្រីម្នាក់រំលោភសេពសន្ថវៈមិន បានសម្រេច ខណៈប្តីនាងមិននៅ ហើយស្ត្រីរងគ្រោះកំពុងតែដេកលង់លក់នៅក្នុងមុងជាមួយកូនៗ ដោយជនសង្ស័យលបចូលទៅធ្វើសកម្មភាពយកកណ្តៀវច្រូតស្រូវទៅគំរាម ក្នុងបំណងចាប់រំលោភ ។ ប៉ុន្តែត្រូវស្ត្រីរងគ្រោះរើបម្រាស់ រួចក៏ស្រែកឆោឡោ បណ្តាលឱ្យភ្ញាក់ទាំងកូនយំពេញផ្ទះផ្អើលដល់ប្រជាពលរដ្ឋរស់នៅជិត ខាង និងបានប្តឹងទៅប៉ូលិសឱ្យចាប់ខ្លួនបានភ្លាមៗ កាលពីវេលាម៉ោង៨ និង៣០នាទីយប់ ថ្ងៃទី២៧ មីនា ស្ថិតក្នុងផ្ទះស្ត្រីរងគ្រោះ នៅភូមិត្រើយទន្លាប់ ឃុំព្រះបាទជាន់ជុំ ស្រុកគិរីវង់។
លោកវរសេនីយ៍ត្រី យុក សារ៉ាត់ អធិការនគរបាលស្រុកគិរីវង់ ឱ្យដឹងថា ជនសង្ស័យមានឈ្មោះថាត់ អាយុ៣៥ឆ្នាំ ជាខ្មែរកម្ពុជាក្រោម បានមកធ្វើការជាកម្មករលីសែងនៅតំបន់នោះ ។ ជននេះបានយកកណ្តៀវច្រូតស្រូវគំរាមស្ត្រីរងគ្រោះ អាយុ២៩ឆ្នាំ មានកូន៣នាក់ ខណៈប្តីមិននៅផ្ទះ ដោយរវល់ទៅធ្វើជាកម្មករនៅឯខេត្តផ្សេង ។
លោកអធិការនគរបាលស្រុក បានបន្តទៀតថា មុនពេលកើតហេតុ ស្ត្រីរងគ្រោះរួមជាមួយកូន៣នាក់ កំពុងតែលង់លក់នៅក្នុងមុងនៅលើគ្រែក្នុងផ្ទះតៀមផ្ទាល់ដី ហើយជនសង្ស័យរូបនេះក៏បានយកកណ្តៀវច្រូតស្រូវភ្ជង់កស្ត្រីរងគ្រោះ និងបានយកដៃសង្កត់ស្មាជាប់មិនឱ្យស្រែក ដោយគំរាមថាបើហ៊ានស្រែក គេនឹងអារ.កសម្លាប់ចោល ។ ប៉ុន្តែដោយសារស្មារតីខ្លាំងមិនភ័យខ្លាចតក់ស្លុតនោះ ស្ត្រីរងគ្រោះបានរើបម្រាស់ដោយចាប់យកកណ្តៀវពីជនសង្ស័យបាន ទើបស្ត្រីរងគ្រោះស្រែកឆោឡោឡើង បណ្តាលឱ្យភ្ញាក់ទាំងកូនតូចៗ និងធ្វើឱ្យមានការភ្ញាក់ផ្អើលដល់បងប្អូននៅក្នុងភូមិជាមួយគ្នា រួមទាំងមេភូមិផងដែរ បានរត់មកចោមរោម និងបានរាយការណ៍ទៅប៉ុស្តិ៍ ដោយប៉ូលិសបានចុះមកជួយអន្តរាគមន៍ចាប់បានជនសង្ស័យភ្លាមៗនោះដែរ ។
នៅចំពោះមុខសមត្ថកិច្ចប៉ូលិស ជនសង្ស័យឈ្មោះថាត់ ស៊ុង បានសារភាពថា រូបគេពិតជាបានធ្វើសកម្មភាពប៉ុនប៉ងចាប់រំលោភទៅលើស្ត្រីរង គ្រោះនេះពិតប្រាកដមែន គឺដោយសារតែគេស្រឡាញ់នាងខ្លាំងពេក រហូតអត់ទ្រាំពុំបាន ហើយគាប់ជួនឃើញឱកាសល្អ ខណៈប្តីរបស់នាងមិននៅផ្ទះផងនោះ គេក៏បានចូលទៅក្នុងផ្ទះ ខណៈនាងកំពុងតែដេកលង់លក់ ។ គេក៏ចាប់ភ្ជង់កនឹងកណ្តៀវគំរាមដើម្បីចាប់រំលោភ ប៉ុន្តែមិនបានសម្រេច ត្រូវនាងរើបម្រាស់រូច និងស្រែកឱ្យគេជួយ ហើយក៏ត្រូវប៉ូលិសចាប់ខ្លួនបានទៅ ។
លោកវរសេនីយ៍ទោ សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្ត បានឱ្យដឹងថា យើងបានកសាងសំណុំរឿងរួចរាល់អស់ហើយ ហើយនៅព្រឹកថ្ងៃទី៣១ មីនា នឹងបញ្ជូនជនសង្ស័យទៅកាន់សាលាដំបូងខេត្ត ដើម្បីចាត់ការតាមនីតីវិធី ៕
ជនជាប់ចោទ
ប្រភពៈ កោះសន្តិភាព
