ភ្នំពេញ: បុរស២នាក់ ជិះម៉ូតូឌុបគ្នា បានទទួលរងរបួសធ្ងន់ ក្រោយពីជិះម៉ូតូទៅប៉ះដៃចង្កូត ជាមួយរ៉ឺម៉កម៉ូតូ ដួលខ្ទាតទៅបោកនឹងទ្វារ រថយន្តកាមរីបាឡែន កាលវេលាម៉ោង ១១និង៣០នាទីយប់ ថ្ងៃទី២៦ ខែមីនា ឆ្នាំ២០១៣ នៅគល់ស្ពានស្ទឹងមានជ័យខាងកើត តាមមហាវិថីព្រះមុនីរ៉េត ក្នុងសង្កាត់បឹងសាឡាង ខណ្ឌទួលគោក។ សាក្សីបានឲ្យដឹងថា មុនពេលកើតហេតុ ម៉ូតូវីវ៉ា ពណ៌ឈាមជ្រូក ជិះគ្នា២នាក់ ក្នុងទិសដៅពីកើតទៅលិច ស្របជាមួយរ៉ឺម៉កម៉ូតូ ខណៈមកដល់ចំណុចខាងលើ ម៉ូតូវីវ៉ា បានបន្ថែមល្បឿន ដើម្បីវ៉ារ៉ឺម៉កម៉ូតូ តែទៅប៉ះដៃចង្កូត ជាមួយរ៉ឺម៉កម៉ូតូ បណ្តាលឲ្យដួល ខ្ទាតទៅបោក ជាមួយទ្វា រថយន្តកាមរីបាឡែន ពណ៌ស្ករ បើកក្នុងទិសដៅបញ្ច្រាសទិសគ្នា រងរបួសធ្ងន់ទាំងពីរនាក់។ ជនរងគ្រោះ ត្រូវរថយន្តសង្គ្រោះ ដឹកយកទៅព្យាបាលនៅមន្ទីរពេទ្យ។ រថយន្តនិងម៉ូតូត្រូវសមត្ថកិច្ចយកទៅខណ្ឌទួលគោក រីឯរ៉ឺម៉កម៉ូតូបើកគេចបាត់៕
ប្រភពៈ CEN
