កោះសន្តិភាព
បណ្តឹងភាគីជនរងគ្រោះក្នុងគ្រោះថ្នាក់ចរាចរណ៍បុករថយន្តតារាចម្រៀងខេមរៈ សិរីមន្ត ទៅដល់តុលាការ
រាជធានីភ្នំពេញ ៖ នៅទីបំផុតភាគីជនរងគ្រោះទាំងអស់នៅក្នុងហេតុការណ៍គ្រោះថ្នាក់ ចរាចរណ៍រវាងរថយន្តក្រុមហ៊ុន SK និងរថយន្តតារាចម្រៀងក្នុងផលិតកម្មសាន់ដេ លោកខេមរៈ សិរីមន្ត កាលពីថ្ងៃទី៧ មីនា ២០១៣ នៅតាមបណ្តោយផ្លូវជាតិលេខ៤ ត្រូវបានបញ្ជូនទៅកាន់តុលាការខេត្តព្រះសីហនុហើយ បន្ទាប់ពីភាគីខាងក្រុម SK នៅមិនទាន់មានដំណោះស្រាយណាមួយតាមការទាមទាររបស់ភាគីជនរងគ្រោះ នោះ ។
តារាកំប្លែងលោកនាយកុយ និងយាយណយ សំណាង បានប្តឹងទាមទារសំណង២៥.០០០ដុល្លារ ពីក្រុមហ៊ុន SK ដែលបង្កគ្រោះថ្នាក់ធ្វើឱ្យបាត់បង់ជីវិតកូនប្រុសរបស់ពួកគាត់ ខណៈតារាចម្រៀងលោកខេមរៈ សិរីមន្ត ទាមទារសំណងជិត១០ម៉ឺនដុល្លារ ។ ការទាមទារប្រាក់សំណងនេះបានធ្វើឡើងកាលពីពាក់កណ្តាលខែមីនា កន្លងទៅនេះ ចំណែកឯនៅក្នុងសមាគមសិល្បករខ្មែរ ដែលមានលោកចារិទ្ធី ជាអនុប្រធានសមាគមបានចូលរួមសម្របសម្រួលផងដែរ ។
ការទាមទារនេះភាគីខាងក្រុមហ៊ុន SK បានយល់ព្រមទទួលយកសំណើរពីភាគីជនរងគ្រោះដើម្បីយកទៅពិចារណាបន្ត ខណៈភាគីជនរងគ្រោះបានទទូចសុំឱ្យមានការដោះស្រាយឱ្យបាន ឆាប់រហ័ស ។ រហូតមកដល់ពេលនេះភាគីខាងជនរងគ្រោះមិនបានទទួលការឆ្លើយតបវិជ្ជ មានណាមួយពីភាគីក្រុមហ៊ុន SK ពាក់ព័ន្ធទៅនឹងការទាមទារខាងលើនេះឡើយ ធ្វើឱ្យភាគីជនរងគ្រោះទាំងអស់បានសម្រេចចិត្តដាក់ពាក្យបណ្តឹងនេះ ទៅកាន់តុលាការខេត្តព្រះសីហនុតែម្តង ៕
ប្រភព កោះសន្តិភាព
