ការធ្វើកោសល្យវិច័យលើសពរបស់ជនប្រឆាំងរុស្ស៊ីសេដ្ឋីបូរីស បេេរ ហ្សូវស្គី ដែលរកឃើញស្លាប់នៅភាគខាងត្បូងអង់គ្លេស លាតត្រដាងថា សេដ្ឋីរូបនេះប្រហែលជាស្លាប់ដោយសារការព្យួរក ។ យោងតាមសេចក្តីប្រកាសមួយរបស់ប៉ូលិសអង់គ្លេស នាថ្ងៃទី២៥ មីនាថា គ្រូពេទ្យធ្វើកោសល្យវិច័យនៃក្រសួងមហាផ្ទៃពុំបានរកឃើញស្លាកស្នាមណាមួយនៃការតស៊ូមុនការស្លាប់នោះទេ ។ ការពិនិត្យឯទៀតៗ ពិសេសការរកសារធាតុពុលត្រូវបន្តធ្វើ ក៏ប៉ុន្តែលទ្ធផលអាចដឹងរយៈពេលជាច្រើនសប្តាហ៍ទៀត ។
ជាអ្នកហ៊ានវាយប្រហារលោកវ៉ា្លឌីមៀរពូទីនពុំខ្លាចរអែង ខណៈលោកជាអ្នកជួយជ្រោមជ្រែងឱ្យលោកពូទីនឡើងកាន់អំណាចកាលពីឆ្នាំ២០០០ លោកបូរីស បេរេហ្សូវស្គី អាយុ៦៧ឆ្នាំ ត្រូវបាននិយោជិតរបស់លោកម្នាក់ប្រទះឃើញស្លាប់កាលពីរសៀលថ្ងៃទី២៣ មីនា ក្នុងបន្ទប់ទឹកផ្ទះរបស់លោក នៅ ASCOT ជាទីក្រុងមួយស្ថិតនៅចម្ងាយ៦០គីឡូម៉ែត្រ ភាគនិរតីក្រុងឡុងដ៍ ។
អ្នកទទួលខុសត្រូវម្នាក់ខាងការស៊ើបអង្កេតរបស់ប៉ូលិសអង់គ្លេសនិយាយថា យើងពុំបានរកឃើញភស្តុតាងណាមួយនៃការចូលរួមរបស់ជនទី៣ណាម្នាក់ ក្នុងការសម្លាប់លោកបេេរហ្សូវស្គីឡើយ ។ អ្នកទទួលខុសត្រូវរូបនេះបដិសេធពាក្យចចាមអារ៉ាមនានាលើមូលហេតុនៃការស្លាប់នោះមុនពេលចេញលទ្ធផលនៃការធ្វើកោសល្យវិច័យ ។មនុស្សជិតដិតមួយចំនួននឹងមហាសេដ្ឋីរូបនេះនិយាយថា គាត់ប្រហែលជាស្លាប់ដោយសារការធុញថប់ ក៏ប៉ុន្តែរឿងធ្វើអត្តឃាតត្រូវបានបដិសេធ ដោយមិត្តភក្តិគាត់ដទៃៗទៀត ។ មុនពេលស្លាប់លោកបូរីស បេរេហ្សូវស្គីនិយាយថាលោកលែងចង់រស់ទៀតហើយ
