ផ្ទះប្រជាពលរដ្ឋដែលរលំដោយសារខ្យល់ព្យុះ
ខេត្តព្រៃវែង ៖ ភ្លៀង១មេធំដែលបក់មកលាយឡំជាមួយនឹងខ្យល់ព្យុះផងនោះ បានបក់បោកគ្របដណ្តប់លើខេត្តព្រៃវែង អស់រយៈពេលជាង២ម៉ោង បណ្តាលឱ្យផ្ទះប្រជាពលរដ្ឋប្រមាណជាង១០០ខ្នង នៅក្នុងស្រុកចំនួន៣ បានរលំ និងប៉ើងខ្ចាត់ខ្ចាយ ។
ព្យុះភ្លៀងដ៏ធំបានចាប់បក់បោកកាលពីវេលា ម៉ោងប្រមាណជាង៤រសៀលថ្ងៃទី១៥ មីនា ២០១៣ ទៅលើស្រុកចំនួន៣ គឺស្រុកស្វាយអន្ទរ ស្រុកមេសាង និងស្រុកបាភ្នំ ដោយមានរយៈពេលជិត៣ម៉ោង ។ តាមការឱ្យដឹងពីមន្ត្រីអ្នកនាំពាក្យកាកបាទក្រហមកម្ពុជាសាខា ខេត្តព្រៃវែង ឱ្យដឹងថា ព្យុះភ្លៀង១មេនេះបានបណ្តាលឱ្យផ្ទះប្រជាពលរដ្ឋប្រមាណជាង១០០ ខ្នងត្រូវដួលរលំ និងប៉ើងខ្ចាត់ខ្ចាយ ដែលក្នុងនោះស្រុកស្វាយអន្ទរ៩៣ខ្នង ស្រុកមេសាង ២៤ខ្នង និងស្រុកបាភ្នំចំនួន១២ខ្នង មិនតែប៉ុណ្ណោះបណ្តាលឱ្យមនុស្ស២នាក់រងរបួសស្រាល និងមេគោផើម១ក្បាល របួសធ្ងន់ផងដែរ ។
គួរកត់សម្គាល់ផងដែរថា នៅដើមឆ្នាំ២០១៣ នេះ សម្រាប់ខេត្តព្រៃវែង គ្រោះធម្មជាតិដែលកើតឡើងហាក់មានភាពសាហាវជាងឆ្នាំមុនៗខ្លាំងណាស់ ដោយគ្រាន់តែមានភ្លៀងធ្លាក់កក់ខែ១មេដំបូងភ្លាម ក៏បណ្តាលឱ្យមានរន្ទះបាញ់ស្លាប់មនុស្សអស់ចំនួន២នាក់ ។ ក្រោយមកមិនទាន់បានប៉ុន្មានផង ភ្លៀងធ្លាក់មួយមេទៀតក៏នាំមកជាមួយនូវខ្យល់ព្យុះដ៏ធំដែល ធ្វើឱ្យមានគ្រោះមហន្តរាយដ៏ធំបំផុត ដែលមិនធ្លាប់មានពីមុនមកសម្រាប់ខេត្តព្រៃវែង ហើយក៏ជាហេតុដែលមិននឹកស្មានដល់ គឺផ្ទះប្រជាពលរដ្ឋរហូតដល់ទៅជាង១០០ខ្នង ត្រូវរលំ និងប៉ើងខ្ចាត់ខ្ចាយដោយរបួសទាំងមនុស្ស និងសត្វថែមទៀតផង៕
ប្រភព កោះសន្តិភាព
