ជនសង្ស័យ២នាក់ដែលត្រូវបានចាប់ខ្លួន
ខេត្តបាត់ដំបង ៖ បុរស២នាក់ដែលអះអាងថា រស់នៅខេត្តតាកែវ បានជាប់អន្ទាក់កម្លាំងនគរបាលព្រហ្មទណ្ឌនៃស្នងការដ្ឋាននគរបាល ខេត្ត ក្រោយពីពួកគេបានធ្វើសកម្មភាពវាយប្លន់យករថយន្តកាមរីបាឡែន១ គ្រឿងពីស្ត្រីម្នាក់ រស់នៅភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីវេលាម៉ោង៤និង៤០នាទីរសៀលថ្ងៃទី២៤ មីនា។
លោកជេត វណ្ណនី ស្នងការរងខេត្តបានថ្លែងថា ជនសង្ស័យទាំង២នាក់ ដែលប្លន់រថយន្តកាមរីបាឡែនពីក្រុងប៉ោយប៉ែតនោះត្រូវកម្លាំង របស់លោកស្ទាក់ចាប់បានកាលពីវេលាម៉ោង៧យប់ថ្ងៃទី២៤ មីនា នៅលើកំណាត់ផ្លូវជាតិលេខ៥ ត្រង់ចំណុចរង្វង់មូល ភូមិអណ្តូងចេញ សង្កាត់អូរចា ក្រុងបាត់ដំបង ។ លោកបន្តថា រថយន្តនោះម៉ាកកាមរីបាឡែន ពណ៌ទឹកប្រាក់ ពាក់ស្លាកលេខភ្នំពេញ២K-១៤៩៥ ។
បើតាមសេចក្តីរាយការណ៍ពីសមត្ថកិច្ចក្រុងប៉ោយ ប៉ែតបានឱ្យដឹងថា ជនរងគ្រោះជាម្ចាស់រថយន្តឈ្មោះសួន គឹមរ៉ង ភេទស្រី អាយុ៤៧ឆ្នាំ រស់នៅភូមិ-ឃុំកើតហេតុខាងលើ ។
លោកជេត វណ្ណនី បានបញ្ជាក់ទៀតថា ស្ត្រីរងគ្រោះត្រូវបានជនសង្ស័យប្រើដងចបកាប់វាយត្រូវចំ កញ្ចឹងកបណ្តាលឱ្យដួលសន្លប់ខណៈគាត់កំពុងនៅក្នុងផ្ទះតែ ម្នាក់ឯង ។ ភា្លមៗនោះពួកគេក៏យកកូនសោបើករថយន្តចេញតែម្តង ដោយយកទាំងទូរស័ព្ទ និងប្រាក់មួយចំនួនផងដែរ ។ លោកបន្ថែមថា ក្រោយពីសមត្ថកិច្ចខេត្តបន្ទាយមានជ័យផ្តល់ព័ត៌មានសុំឱ្យជួយ អន្តរាគមន៍នោះមក លោកស្នងការខេត្តក៏ចេញបញ្ជាឱ្យកម្លាំងជំនាញចេញស្ទាក់ចាប់បានភ្លាមៗ តែម្តង ។
នៅចំពោះមុខសមត្ថកិច្ច ជនសង្ស័យឈ្មោះកង រ៉ាវុធ បានសារភាពថា ពួកខ្លួនទាំង២នាក់ពិតជាបានវាយស្ត្រីរងគ្រោះនោះ ដើម្បីប្លន់យករថយន្តមែន ។ ជននេះបន្តថា ខ្លួននិងស្ត្រីរងគ្រោះធ្លាប់ស្គាល់ និងរាប់អានគ្នាជាបងធម៌អស់រយៈពេលជាងកន្លះឆ្នាំមកហើយ ហើយពួកគេក៏ឧស្សាហ៍មកលេងល្បែងក្នុងកាស៊ីណូនៅក្រុងប៉ោយប៉ែត នេះដែរ ។
ជនសង្ស័យនេះបញ្ជាក់ថា ខ្លួននិងបងស្រីធម៌ធ្លាប់ដើរផឹកស៊ីជាមួយគ្នាញឹកញាប់ទៀតផង នៅពេលខ្លួនមកលេងក្រុងប៉ោយប៉ែតម្តងៗ ។ តាមពិតទៅ មុនដំបូងពួកគេក៏គ្មានគោលបំណងចង់ប្លន់គាត់ដែរ ប៉ុន្តែដោយសារការមកលេងកាស៊ីណូលើកនេះចាញ់ល្បែងទើបពួកគេ រៀបចំគម្រោងប្លន់គាត់តែម្តងទៅ ។
ជនសង្ស័យកង រ៉ាវុធ ក៏បាននិយាយថា ពួកខ្លួនបានមកលេងកាស៊ីណូលើកនេះរយៈពេលប្រហែល១០ថ្ងៃកន្លងម កហើយ ដោយស្នាក់នៅផ្ទះសំណាក់«ភ្នំពេជ្រ» ក្រុងប៉ោយប៉ែត ។ នៅថ្ងៃកើតហេតុពួកខ្លួនចាប់ផ្តើមរៀបចំគម្រោងប្លន់បងស្រីធម៌ ដោយជិះម៉៉ូតូឌុបទៅផ្ទះគាត់ ។ លុះពេលទៅដល់ផ្ទះរបស់គាត់ ហើយគាប់ជួនឱកាសល្អផ្តល់ឱ្យផង ខណៈឃើញបងស្រីធម៌អង្គុយក្នុងផ្ទះម្នាក់ឯងទៀតនោះ ពួកខ្លួនក៏ដើរចូលទៅជជែកគ្នាលេងជាមួយគាត់ប្រហែល១៥នាទី ទើបខ្លួនងើបដើរទៅខាងក្រោយផ្ទះ ហើយប្រទះឃើញដងចបកាប់មួយ គេក៏ទាញមកវាយបងស្រីធម៌ចំនួន២ដងចបចំកញ្ចឹងក បណ្តាលឱ្យគាត់ដួលសន្លប់ ។ រីឯឈ្មោះគីម កុសល ក៏បានជួួយចាប់ និងរកកូនសោរថយន្ត ។
ជនសង្ស័យកង រ៉ាវុធ បាននិយាយទៀតថា បន្ទាប់មកពួកខ្លួនបានយកកូនសោពីក្នុងហោប៉ៅខោ ទូរស័ព្ទអាយហ្វូន១គ្រឿង និងប្រាក់មួយចំនួនផង រួចបើករថយន្តចេញភ្លាមៗតែម្តង ។ ជនសង្ស័យទាំង២បាននាក់បញ្ជាក់ថា ពេលចេញដំណើរផុតពីក្រុងប៉ោយប៉ែតបន្តិច ពួកគេបានឈប់ចាក់សាំងរថយន្តចំនួន៤០លីត្រ រួចបម្រុងបន្តដំណើរឆ្ពោះទៅកាន់រាជធានីភ្នំពេញ ។ ប៉ុន្តែគ្រាន់តែមកដល់ខេត្តបាត់ដំបង ក៏ឃើញសមត្ថកិច្ចខេត្តឈរលើដងផ្លូវព្រោងព្រាតស្ទាក់ចាប់បាន តែម្តងទៅ ។ តាមប្រភពព័ត៌មានពីសមត្ថកិច្ចក្រុងប៉ោយប៉ែតបានឱ្យដឹងថា ស្ត្រីរងគ្រោះបានរងរបួសធ្ងន់ រហូតដល់សន្លប់បាត់ស្មារតី ។ ប៉ុន្តែក្រោយពីគ្រូពេទ្យប្រឹងប្រែងជួយសង្គ្រោះមក គាត់ក៏បានដឹងខ្លួនឡើងវិញ ។
លោកជេត វណ្ណនី ស្នងការរងខេត្តបាត់ដំបង ក៏បានបញ្ជាក់ដែរថា ជនសង្ស័យមិនបានបដិសេធនូវទង្វើរបស់ខ្លួនទេ ដោយបានសារភាពទាំងអស់ ពីអំពើប្លន់រថយន្តខាងលើនេះ ។ លោកបន្តថា ករណីនេះលោកស្នងការខេត្ត នឹងត្រៀមប្រគល់ទាំងរថយន្តទាំងជនសង្ស័យទៅឱ្យសមត្ថកិច្ចបន្ទាយ មានជ័យចាត់ការបន្តនៅព្រឹកថ្ងៃទី២៥ មីនា ពីព្រោះការប្រព្រឹត្តបទល្មើសនេះបានកើតឡើងនៅក្នុងទឹកដី ខេត្តបន្ទាយមានជ័យ ៕
កោះសន្តិភាព
