ភ្នំពេញ ៖ យុវសិស្សម្នាក់ខណៈពេលជិះម៉ូតូម្នាក់ឯងយកបាយឲ្យបងត្រូវរថយន្ត មួយគ្រឿងដែលបើកបរស្របទិសគ្នាកៀរឲ្យដួលបាក់ជើងឆ្វេងម្ខាងម៉ូតូ រងរបួសបន្តិចបន្តួច ហើយជនរងគ្រោះត្រូវបានដឹកយកទៅសង្គ្រោះនៅមន្ទីរពេទ្យភ្លាមៗ។
ហេតុការណ៍នេះបានកើតឡើងកាលពីវេលាម៉ោង១១ថ្ងៃត្រង់ថ្ងៃទី២២ខែ មីនាឆ្នាំ២០១៣នៅលើផ្លូវបេតុងភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ។
ជនរងគ្រោះមានឈ្មោះ ចៅប៉ាវសឹង ភេទប្រុសអាយុ១៧ឆ្នាំមុខរបរជាសិស្សរស់នៅភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ បានរងរបួសបាក់ជើងឆ្វេង។ ជនរងគ្រោះជិះម៉ូតូម៉ាកស៊ុយស៊ូគីស្មាស់ពណ៌ខ្មៅពាក់ស្លាកលេខ ភ្នំពេញ1BI- 9135 ហើយម៉ូតូនេះគ្រាន់តែរងការខូចខាតបន្តិចបន្តួចប៉ុណ្ណោះ។ រីឯរថយន្តដែលប៉ះជាមួយម៉ូតូនោះម៉ាក គាពណ៌សចំណុះ២តោនកន្លះអត់ស្លាកលេខ បើកបរដោយឈ្មោះ អៀងឡុងភេទប្រុសអាយុ៣៨ឆ្នាំ។
តាមប្រភពព័ត៌មាននៅកន្លែងកើតហេតុបានឲ្យដឹងថាមុនពេលកើតហេតុ រថយន្តនិងម៉ូតូបើកបរស្របទិសគ្នាពីជើងទៅត្បូង ពេលនោះរថយន្តបានសសៀរបត់ស្ដាំបម្រុងបត់ចូលផ្ទះ តែម៉ូតូជនរងគ្រោះវិញមិនបានបន្ថយល្បឿននោះទេគឺរឹតតែបន្ថែមល្បឿន វ៉ាស្ដាំខំឲ្យផុតរថយន្ត តែដោយសារវ៉ាមិនផុតទើបកៀរជាមួយរថយន្តនោះតែម្ដង។
ប្រភពបន្ដថាម៉ូតូបានកៀបជាប់ក្រោមរថយន្ត រីឯជនរងគ្រោះបានខ្ទាតចេញពីក្រោមកង់រថយន្ត តែបានបាក់ជើងឆ្វេងម្ខាងទៅហើយ។ ក្រោយពេលកើតហេតុប៉ូលិសបាននាំយកម៉ូតូនិងរថយន្តទៅរក្សាទុកនៅផ្នែក សណ្ដាប់ធ្នាប់នៃអធិការដ្ឋាននគរបាលខណ្ឌពោធិ៍សែនជ័យរង់ចាំធ្វើការ ដោះស្រាយគ្នាតាមផ្លូវច្បាប់៕
