ជាមួយនឹងស្នាមញញឹមនៅលើមុខរបស់លោកស្រី, ស្លៀកពាក់ក្នុងឈុតធំពណ៌ខ្មៅសាមញ្ញ (សម្រាប់ស្ត្រី) និង យួរកាបូបគ្មានម៉ាកដ៏សមសួនមួយ ជំទាវទីមួយរបស់ចិន អ្នកស្រី ផេង លីយួន បានបោះជំហានចូលក្នុងការបង្ហាញមុខមាត់ជាអន្តរជាតិកាលពីថ្ងៃទី ២២ មីនា ២០១៣ និង បានក្លាយជាការចាប់អារម្មណ៍ភ្លាមៗតាមអ៊ីនធឺណេតនៅក្នុងស្រុករបស់ខ្លួន ។
បោះជំហានចេញពីយន្តហោះក្នុងទីក្រុងមូស្គូ ដែលជាទីសំចតលើកដំបូងនៃដំណើរទស្សនកិច្ចនៅបរទេសជាបឋមរបស់ប្រធានាធិបតី ស៊ី ជីនពីងចាប់តាំងពីការទទួលកាន់តំណែងបន្តមក រូបរាងដ៏មានមន្តស្នេហ៍ និង សេចក្តីស្រឡាញ់ជាក់ស្តែងរបស់អ្នកស្រីផេងចំពោះស្វាមីមាឌធំរបស់ខ្លួន បានធ្វើឲ្យអ្នកលេងតាម Microblog របស់ចិននាំគ្នាលាន់មាត់សរសើរគ្រប់ៗគ្នា ។
អ្នកប្រើប្រាស់សេវាកម្មវេបសាយ Sina Weibo ស្រដៀងនឹង Twitter ដ៏មានប្រជាប្រិយភាពរបស់ចិនបានសរសេរថា "ស្រស់ស្អាតណាស់ អ្នកស្រី ផេង លីយួន ស្អាតមែនទែន! ម្តេចក៏ស្រគត់ស្រគំ និង ថ្លៃថ្នូរអ្វីម្ល៉េះ" ។
អ្នកលេង Weibo ម្នាក់ទៀតបានសរសេរថា "តើនរណាមិនលង់ស្រឡាញ់ស្ត្រីបែបនេះ និង រីករាយជាមួយគាត់យ៉ាងងុបងុលនោះ?" ។
Taobao វេបសាយលក់ទំនិញតាមអនឡាស្រដៀងនឹង eBay និង Amazon ភ្លាមៗបានចាប់ផ្តើមផ្តល់ជូននូវការលក់អាវធំស្តាយដូចអាវធំរបស់អ្នកស្រីផេងដែរ ដោយផ្សព្វផ្សាយអាវនោះថាជា "ស្តាយដូចគ្នាទៅនឹងស្តាយរបស់ជំទាវទីមួយ" ។
អ្នកខ្លះទៀតនាំគ្នាងឿងឆ្ងល់ថាតើម៉ាកកាបូប និង ស្បែកជើងរបស់គាត់គឺជាម៉ាកអ្វី ។ អ្នកលេង Weibo ម្នាក់ផ្សេងទៀតបានសរសេរថា "ស្បែកជើងរបស់គាត់មើលទៅពិតជាឧត្តុង្គឧត្តមខ្លាំងណាស់ ហើយនរណាជាអ្នករចនាម៉ូដកាបូបរបស់គាត់?" ។
អ្នកស្រីផេងមានភាពល្បីល្បាញក្នុងប្រទេសចិនក្នុងនាមជាអ្នកចម្រៀង ហើយអស់ជាច្រើនឆ្នាំកន្លងមកនេះកាន់តែល្បីដោយមិនអាចប្រកែកបាន និងជាក់ស្តែងណាស់មានប្រជាប្រិយភាពជាងប្តីរបស់គាត់ទៅទៀត ។
មនុស្សដែលធ្លាប់ជួបលោកស្រី និង ស្គាល់លោកស្រីបាននិយាយថា អ្នកស្រីផេងមានភាពរួសរាយពីធម្មជាតិ និង គួរឲ្យចង់រាប់អាន បើទោះបីជាអ្នកស្រីត្រូវបានបង្គាប់ឲ្យកាន់តំណែងជំទាវបន្ទាប់ពីលោកស៊ីបានក្លាយជាអនុប្រធានាធិបតីក្នុងឆ្នាំ ២០០៧ ខណៈដែលលោកបានត្រូវត្រៀមខ្លួនសម្រាប់អំណាចរដ្ឋក៏ដោយ ។
ប៉ុន្តែលោកស្រីត្រូវគេរំពឹងថានឹងត្រូវបានផ្តល់ជូននូវព្រឹត្តិការណ៍ជាសាធារណៈផ្ទាល់របស់លោកស្រីដើម្បីចូលរួមក្នុងដំណើររបស់លោកស៊ីទៅកាន់រុស្ស៊ី តង់ហ្សានី អាហ្វ្រិចខាងត្បូង និង សាធារណៈរដ្ឋកុងហ្គោក្នុងដំណើរទស្សនកិច្ចរយៈពេលមួយសប្តាហ៍ពេញ ខណៈដែលរដ្ឋាភិបាលចិនកំពុងព្យាយាមធ្វើឲ្យធូរស្បើយឡើងវិញនូវមុខមាត់របស់ចិននៅក្រៅប្រទេស ។
អ្នកស្រីផេងបានទទួលការកោតសរសើរចំពោះការគាំទ្ររបស់ខ្លួនក្នុងបុព្វហេតុសត្វចិញ្ចឹម ហើយគួរឲ្យកត់សម្គាល់បំផុតគឺបុព្វហេតុដើម្បីកុមារដែលរស់នៅជាមួយអេដស៍ និង ហ៊ីវ និង អាចទៅទស្សនាអង្គការសប្បុរសធម៌នានាដែលពាក់ព័ន្ធនឹងបញ្ហានេះ ខណៈបំពេញទស្សនកិច្ចនៅក្រៅប្រទេសផងដែរ ។
គួរបញ្ជាក់ថា អ្នកស្រីផេងគឺជាប្រពន្ធទីពីររបស់លោកស៊ី ហើយអ្នកទាំងពីរមានកូនស្រីម្នាក់កំពុងសិក្សានៅសាកលវិទ្យាល័យហាវើដក្រោមឈ្មោះក្រៅផ្លូវការមួយ ៕
ប្រភពៈ កោះសន្តិភាព
