រាជធានីភ្នំពេញ ៖ រថយន្តឡិចស៊ីស LX៤៧០ ពណ៌ខ្មៅ ជិះគ្នា៤នាក់ បានរេចង្កូតទៅបុកជាមួយម៉ូតូវីវ៉ា ពណ៌ក្រហម មួយគ្រឿងជិះគ្នា២នាក់ ពេញទំហឹង បណ្តាលឲ្យអ្នកជិះម៉ូតូរងរបួសស្រាលទាំង២នាក់ កាលពីវេលាម៉ោង៦និង៣០នាទីល្ងាចថ្ងៃទី២១ មីនា តាម ផ្លូវជាតិលេខ៦ទល់មុខផ្ទះសំណាក់ហេងលាភ ក្រុមទី៩ សង្កាត់ព្រែកលៀប ខណ្ឌឫស្សីកែវ រថយន្តបង្កបានបើករត់ទៅដល់សង្កាត់ជ្រោយចង្វា ត្រូវសមត្ថកិច្ចចាប់បាន ។
សាក្សីបានឲ្យដឹងថា រថយន្តឡិចស៊ីស LX៤៧០ បើកក្នុងទិសដៅពីកើតទៅលិច ចំណែកម៉ូតូវីវ៉ា ពណ៌ក្រហម ជិះគ្នា២នាក់ ក្នុងទិសដៅបញ្រ្ចាសទិសគ្នា លុះមកដល់ចំណុចកើតហេតុរថយន្តបានរេចង្កូតចូលទៅចំណែកផ្លូវរបស់ម៉ូតូក៏បុកម៉ូតូពេញទំហឹង បណ្តាលឱ្យមនុស្សខ្ទាតចេញពីម៉ូតូរងរបួសទាំង២នាក់ ។ក្រោយកើតហេតុរថយន្តបង្កបានព្យាយាមបើករត់ទៅដល់សង្កាត់ជ្រោយចង្វាត្រូវសមត្ថកិច្ចឃាត់រថយន្តបានរួចនាំយកទៅដោះស្រាយនៅប៉ុស្តិ៍នគរបាលសង្កាត់ព្រែកលៀប ៕
ប្រភពៈ កោះសន្តិភាព
