ចៅក្រមស៊ើបអង្កេតបារាំង៖ ការស្លាប់របស់គ្រួសារបុរសបារាំង វ៉ាលីយេ មិនមែនជាការធ្វើអត្តឃាតទេ

Sunday, March 24, 2013

ពត៌មានជាតិ

ភ្នំពេញ: ស្ថានទូតបារាំង ប្រចាំកម្ពុជា បានប្រកាសថា លោកស្រី ក្លូឌីន អង់ហ្វ៊ូ ចៅក្រមស៊ើបសួរ ទទួលបន្ទុកស្រាវជ្រាវករណីនៃការស្លាប់របស់គ្រួសារលោក វ៉ាលីយេ និងក្រុមស៊ើបអង្កេតរបស់លោកស្រី នឹងចាកចេញពីប្រទេសកម្ពុជា បន្ទាប់ពីក្រុមចៅក្រមតុលាការបារាំង បានមកកាន់ប្រទេសកម្ពុជា ហើយចុះទៅស៊ើបអង្កេតសំណុំរឿងក្តីឃាតកម្មនោះ កាលពីថ្ងៃទី១២ ខែមីនា ឆ្នាំ២០១៣។ ជាលទ្ធផលបឋម ចៅក្រមបារាំងរកឃើញថា គ្រួសាររបស់លោក វ៉ាលីយេ មិនមែនធ្វើអត្តឃាតទេ។

សេចក្តីប្រកាស ចុះថ្ងៃទី២២ ខែមីនា ឆ្នាំ២០១៣ បង្ហាញថា ចៅក្រមស៊ើបអង្កេត និងក្រុមអ្នកច្បាប់បារាំង ដែលត្រៀមចាកចេញពីប្រទេសកម្ពុជា សូមថ្លែងអំណរគុណយ៉ាងជ្រាលជ្រៅ ដល់អាជ្ញាធរកម្ពុជាគ្រប់លំដាប់ថ្នាក់ ទាំងស្ថាប័នតុលាការ និងនគរបាល ដែលបានចូលរួមសហការយ៉ាងល្អឥតខ្ចោះ។
សេចក្តីប្រកាសខ្លី បានកត់សម្គាល់ថា ការស្រាវជ្រាវមានការវិវត្តយ៉ាងខ្លាំង ដែលលទ្ធផលបង្ហាញថា ករណីនេះ មិនមែនជាការធ្វើអត្តឃាតនោះឡើយ។
នៅថ្ងៃ៥មេសា ឆ្នាំ២០១៣ ស្ថានទូតបារាំងប្រចាំកម្ពុជា បានប្រកាសផ្លូវការបញ្ជាក់ថា តាមរយៈការធ្វើកោសល្យវិច័យ DNA សាកសព នៅក្នុងរថយន្ត ដែលលិចក្នុងទឹកស្រះនោះ គឺជាសាកសពរបស់ក្រុមគ្រួសាររបស់លោក ឡូរ៉ង់ វ៉ាលីយេ។សេចក្តីប្រកាសព័ត៌មាន របស់ស្ថានទូតបារាំង កាលណោះ បានសរសេរថា ការស៊ើបអង្កេតមួយ ដោយចៅក្រមស៊ើបសួររបស់បារាំង ក៏បានធ្វើឡើង ខណៈដែលតុលាការខេត្តកំពង់ស្ពឺ ក៏បានបើកការស៊ើបអង្កេតផងដែរ។
ចៅស៊ើបអង្កេតរបស់បារាំង ក៏បានចេញដីកាអន្តរជាតិមួយ ដើម្បីស្នើសុំអោយបញ្ជូនគ្រោងឆ្អឹងរបស់ក្រុមគ្រសារលោកវ៉ាលីយេទៅប្រទេសបារាំងដើម្បីការស៊ើបអង្កេតបន្ថែម។
គួរបញ្ជាក់ថា លោក ឡូរ៉ង់ វ៉ាលីយេ បានចូលមករស់នៅកម្ពុជា អំឡុងឆ្នាំ២០០០ ដោយរៀបការនឹងស្ត្រីខ្មែរ តែក្រោយមកប្រពន្ធនលោក វ៉ាលីយេ បានស្លាប់នៅក្រោយពេលសំរាលកូនទី៤៕
ដោយ: លី សិលា - CEN

Posted By:

Copyright @ 2013 Mobile88. Designed by Templateism | MyBloggerLab