សិង្ហបុរី ៖ តារាចម្រៀងរូបសង្ហាល្បីរន្ទឺនៅអាស៊ីដែលជាសមាជិករបស់Big Bang ដែលមានរហ័សនាមថា G-Dragon នឹង មកសម្តែងការប្រគំតន្ត្រីទោលតែម្នាក់ឯងលើកដំបូងនៅក្នុងប្រទេស សិង្ហបុរីនៅពហុកីឡាដ្ឋានសិង្ហបុរីចាប់ពីថ្ងៃទី២៩និង៣០ ខែមិថុនា ឆ្នាំ២០១៣។
នេះជាផ្នែកមួយនៃការប្រគំតន្ត្រីទេសចរណ៍អន្តរជាតិដែលមានឈ្មោះ «One Of A Kind» របស់ តារារូបនេះ។ តារាចម្រៀងវ័យ២៤ឆ្នាំរូបនេះបានរៀបលេងស្តាយល័សំលៀកបំពាក់និង ការតុបតែងឆាកដែលលំនាំតាមស្តេចចម្រៀងប៉ុបអាមេរិក ម៉ៃឃើល ជេស៊ុន ដែលសម្តែងក្នុងកម្មវិធីប្រគំតន្ត្រីរបស់គាត់«This Is It»។
អ្នករៀបចំកម្មនៅប្រទេសសិង្ហបុរីបានឲ្យដឹងថា ការប្រគំតន្ត្រីរបស់កំពូលតារាចម្រៀង G-Dragon គឺជាការសម្តែងទោលផ្តាច់មុខដោយរូបគេនឹងសម្តែងជាលក្ខណៈផ្ទាល់ខ្លួន និងជួបជាមួយអ្នកគាំទ្រផ្ទាល់តែម្តង។
តារាចម្រៀងរូបសង្ហា G-Dragon នឹងចាប់ផ្តើមសម្តែងក្នុងកម្មវិធីប្រគំតន្ត្រីទេសចរណ៍អន្តរជាតិ«One Of A Kind»នៅក្នុង ប្រទេសអាស៊ីដោយចាប់ផ្តើមដំបូងនៅទីក្រុងសេអ៊ូលកាលពីខែមុន។ បន្ទាប់មករូបគេនឹងទៅសម្តែងនៅប្រទេសចិន ហុងកុង ថៃ ឥណ្ឌូនេស៊ី ម៉ាឡេស៊ី និងតៃវ៉ាន់៕
ប្រភព រស្មីកម្ពុជា
