តារាចម្រៀងល្បីឈ្មោះ ខេមរៈ សិរីមន្ត កំពុងរង់ចាំមេធាវីរបស់លោកប្រចាំការនៅខេត្តព្រះសីហនុផ្ដល់ដំណឹង ដើម្បីទៅបំភ្លឺបន្ថែមដល់តុលាការខេត្តនេះ ពាក់ព័ន្ធករណីគ្រោះថ្នាក់ចរាចរកន្លងមក។
លោក ខេមរៈ សិរីមន្ត កាលធ្វើសន្និសីទកាសែតស្តីពីគ្រោះថ្នាក់លើក្រុមការងារលោកកន្លងមក
នៅក្នុងជំនួបថ្មីមួយទៀតកាលពីព្រឹកម្សិលមិញនេះ លោក ខេមរៈ សិរីមន្ត បានឲ្យដឹងថា រូបលោកនៅតែមានជំនឿលើចំណាត់ការរបស់តុលាការខេត្តព្រះសីហនុ ចំពោះក្រុមហ៊ុនSK។ ទោះយ៉ាងណា តារាចម្រៀងរូបនេះបានបញ្ជាក់ថា រូបលោកកំពុងតែរង់ចាំដំណឹងដើម្បីទៅផ្ដល់សក្ខីកម្មបន្ថែមទៀត ចំពោះមុខតុលាការ។សិរីមន្ត បាននិយាយថា “យ៉ាងយូរចុងខែនេះ ខ្ញុំត្រូវទៅបំភ្លឺចំពោះតុលាការបន្ថែមទៀត តែត្រូវរង់ចាំការផ្ដល់ដំណឹងពីមេធាវីនៅទីនោះសិន”។ តារាចម្រៀងសាន់ដេ រូបនេះ បន្តថា មានមេធាវីរបស់លោកមួយរូបប្រចាំការនៅខេត្តព្រះសីហនុស្រាប់ហើយ សម្រាប់ជូនដំណឹងថា លោក ត្រូវចូលទៅបំភ្លឺពេលណា។ ប៉ុន្តែតារាចម្រៀងសំណព្វចិត្តយុវវ័យរូបនេះ ធ្លាប់បានបញ្ជាក់ថា នៅរអាចំពោះផ្លូវជាតិលេខ៤នៅឡើយ។
បណ្ដឹង ទាមទារសំណងពីក្រុមហ៊ុន SK របស់តារាចម្រៀង ខេមរៈ សិរីមន្ត និងគ្រួសារជនរងគ្រោះផ្សេងទៀត កំពុងស្ថិតនៅក្នុងដំណាក់កាលទ្រឹងនៅឡើយ។ រហូតមកដល់ពេលនេះនៅមិនទាន់មានសេចក្ដីបញ្ជាក់ ឬដំណោះស្រាយណាមួយពីភាគីក្រុមហ៊ុននោះដែរ ស្របពេលដែលតុលាការខេត្តព្រះសីហនុក៏កំពុងបន្តដំណើរការរបស់ខ្លួន។
លោក សិរីមន្ត នៅលើឆាកតន្ត្រី
មក ដល់ចំណុចនេះ សិរីមន្ត បានសម្ដែងសុទិដ្ឋិនិយមថា “ខ្ញុំសង្ឃឹមលើតុលាការនឹងមានចំណាត់ការបានលឿនមិនខាន។ ខ្ញុំ និងគ្រួសារជនរងគ្រោះផ្សេងទៀត កំពុងទន្ទឹងរង់ចាំដំណោះស្រាយ”។ដោយឡែក តារាកំប្លែងល្បីឈ្មោះជាយូរឆ្នាំមកហើយ លោក ជួង ជី ហៅនាយ កុយ ធ្លាប់បានឲ្យដឹងថា រូបលោកមិនបានដឹងពីព័ត៌មាននៃការចេញទៅបំភ្លឺអ្វីនោះទេ ព្រោះតុលាការមិនបានជូនដំណឹង។ ម្យ៉ាងទៀត នេះជានីតិវិធីរបស់តុលាការខេត្តព្រះសីហនុ។ លោកថា “លោកប្អូន សិរីមន្ត ជាអ្នកនៅក្នុងហេតុការណ៍គ្រោះថ្នាក់ចរាចរនោះ ដូច្នេះប្រហែលដោយសារបែបនេះ ទើបបានជាតុលាការហៅតែគាត់ឲ្យទៅបំភ្លឺ”។
ប៉ុន្តែ លោកបញ្ជាក់ថា លោក និងក្រុមគ្រួសារជនរងគ្រោះដទៃទៀតនៅតែរង់ចាំដំណោះស្រាយរបស់ តុលាការ ក្នុងការរកយុត្តិធម៌ដល់ជនរងគ្រោះដែលបានស្លាប់បាត់បង់ជីវិតនៅ ក្នុងហេតុការណ៍គ្រោះថ្នាក់ចរាចរកន្លងទៅនេះ និងបណ្ដឹងទាមទារសំណងពីក្រុមហ៊ុនSK ដែលបានដាក់ទៅហើយនោះ៕
ប្រភពៈ សប្បាយ
