បុរសម្នាក់ត្រូវបានខ្សែភ្លើងឆក់ស្លាប់នៅមាត់ទន្លេបាក់ ខណៈទៅតខ្សែភ្លើងដើម្បីឆក់ត្រី ហេតុការណ៍នេះកើតឡើងកាលពីវេលា ម៉ោង១២ថ្ងៃត្រង់ ថ្ងៃទី២២ ខែមេសា ឆ្នាំ២០១៣ ឋិតក្នុងភូមិទួលរកា២ សង្កាត់ចាក់អង្រែក្រោម ខណ្ឌមានជ័យ ។ ជនរងគ្រោះមានឈ្មោះ ម៉ៃ ផល្លីន ហៅបឿន អាយុ២៥ឆ្នាំ ជាកម្មករលក់ឫស្សី មានទីលំនៅផ្ទះជួលភូមិទួលរកា សង្កាត់ចាក់អង្រែក្រោម ខណ្ឌ មានជ័យ។ តាមប្រភពព័ត៌មានពីកម្មករធ្វើឫស្សីដូចគ្នាបានឱ្យដឹងថា នៅមុនពេលកើតហេតុ ជនរងគ្រោះបានចុះពីផ្ទះលក់ឫស្សីផ្ទះលេខ៦៨២ ក្រុមទី២៩ ភូមិទួលរកា២ បានទៅលួចតខ្សែភ្លើងដើម្បីឆក់ត្រី មួយសន្ទុះក្រោយមកស្រាប់តែឮសំឡេងស្រែកឱ្យជួយផង ទៅកាន់កម្មកររត់ទៅមើល ឃើញជនរងគ្រោះដេកដួលនៅមាត់ទន្លេ ដោយនៅមានកាន់ខ្សែភ្លើង ។ ឃើញដូច្នោះ កម្មករដូចគ្នាក៏ដកខ្សែភ្លើងចេញ ហើយបាភក់ដាក់ពីលើជន រងគ្រោះ តែមិនអាចសង្គ្រោះបានឡើយ ប្រមាណ២០នាទីក្រោយ ជនរងគ្រោះបានស្លាប់ ។
