ជិះ​ម៉ូតូ​ឃ្លី​ក​ឆក់​ទូរស័ព្ទដៃ​ពី​នារី​ម្នាក់​ជិះ​ម៉ូតូ​ឃ្លី​ក​ដូចគ្នា ម្ចាស់​ទូរស័ព្ទ​ដេញ​ជ្រុល​ទៅបុក​ឡាន​ត្រូវ​ប៉ូលិស​ចាប់បាន​ចោរ​២​នាក់ ​ ​

 ភ្នំពេញ​៖ នារី​ម្នាក់​បាន​រងរបួស​យ៉ាងធ្ងន់ធ្ងរ ដោយសារ​ជិះ​ម៉ូតូ​ដេញចោរ​ពីរ​នាក់​ដែល​ជិះ​ឆក់​ទូរស័ព្ទដៃ បណ្តាល​ឲ្យ​ជ្រុល​ល្បឿន​ទៅបុក​ជាមួយ​រថយន្ត​ដែល​បើកបរ​បញ្ច្រាសទិស​គ្នា រងរបួស​ជា​ទម្ងន់ ហើយ​ចោរ​ពីរ​នាក់​ត្រូវ​សមត្ថកិច្ច​ប៉ូលិស​ចាប់ខ្លួនបាន​។ ហេតុការណ៍​នេះ​កើតមានឡើង​នៅ​ចំណុច​មុខផ្ទះ​លេខ​២១​បេ ផ្លូវ​១៥៥ ក្រុមទី​២១ ភូមិ​៣ សង្កាត់​ផ្សារ​ដើមថ្កូវ ខណ្ឌចំការមន កាលពី​វេលា​ម៉ោង ១៩​និង​៣០​នាទី​យប់ ថ្ងៃទី​២៣ ខែមេសា ឆ្នាំ​២០១៣​។ ​នារី​រងគ្រោះ​ក្នុង​ហេតុការណ៍​ខាងលើនេះ មិនទាន់​ត្រូវបាន​ស្គាល់​អត្តសញ្ញាណ​ទេ ដោយសារ​ក្រុមគ្រួសារ​និង​សមត្ថកិច្ច​ដឹក​យកទៅ​សង្គ្រោះ​នៅ​មន្ទីរពេទ្យ​មិត្តភាព​ខ្មែរ​សូ​វៀត​ភ្លាមៗ​។ 

      ដោយឡែក​ជនសង្ស័យ​ជា​ចោរឆក់​ពីរ​នាក់ ដែល​សមត្ថកិច្ច​ឃាត់ខ្លួន​បាន​ខាងលើនេះ ទី​១ ឈ្មោះ សុខ ចំរើន អាយុ​១៨​ឆ្នាំ មុខរបរ​កម្មករ​រោងចក្រ ស្នាក់នៅ​ផ្ទះជួល ស្ថិតនៅ​សង្កាត់​ដង្កោ ខណ្ឌដង្កោ និង​ម្នាក់ទៀត​ឈ្មោះ ទិ​ត្យ ណា​រ៉ា អាយុ​១៩​ឆ្នាំ មុខរបរ​ជា​និស្សិត​សាកលវិទ្យាល័យ​អាស៊ី​អឺរ៉ុប ស្នាក់នៅ​ជាមួយគ្នា​។ ​ ​
      តាម​ចម្លើយសារភាព​របស់​យុវជន​ទាំងពីរ​នាក់​ខាងលើ​បាន​ឲ្យ​ដឹងថា មូលហេតុ​ដែល​ខ្លួន​ជិះ​ម៉ូតូ​ឃ្លី​ក ពណ៌​សលាយ​ក្រហម ពាក់​ស្លាក​លេខ​ព្រៃវែង 1B-0558 ធ្វើ​សកម្មភាព​ឆក់​ទូរស័ព្ទដៃ​ម៉ាក​អាយ​ហ្វូ​ន​ហ្វ័​រ​(Iphone4) ពី​នារី​រងរ​គ្រោះ​ខាងលើ ដែល​ជិះ​ម៉ាក​ឃ្លី​ក ពណ៌​ខ្មៅ ពាក់​ស្លាក​លេខ​ភ្នំពេញ 1M-2794 នៅ​ចំណុច​ក្បែរ​ផ្សារ​ទួល​ទំពូង បានសម្រេច​ហើយ ក៏​ជិះ​រត់តាម​បណ្តោយ​ផ្លូវ​លេខ​១៥៥ ក្នុងទិសដៅ​ពី​ជើង​ទៅ​ត្បូង លុះដល់​ចំណុចកើតហេតុ​ខាងលើ ក៏ត្រូវ​នារី​ម្ចាស់​ទូរស័ព្ទ​ជិះ​ម៉ូតូ​ដេញ បណ្តាល​ឲ្យ​ជ្រុល​ទៅបុក​រថយន្ត​មួយគ្រឿង​ម៉ាក KEA morning ពាក់​ស្លាក​លេខ​បណ្តោះអាសន្ន 3743 ដែល​ជិះ​បញ្ច្រាសទិស​គ្នា បណ្តាល​ឲ្យ​ម៉ូតូ​ទាំងពីរ​គ្រឿង​ដួល ហើយ​នារី​រងគ្រោះ​រងរបួស​ធ្ងន់ ចំណែក​ចោរ​ទាំងពីរ​នាក់ ត្រូវបាន​ប្រជាពលរដ្ឋ​ព្រួត​វាយ​ទ្រោម​ខ្លួន ចាប់​ប្រគល់​ឲ្យ​សមត្ថកិច្ច​នគរបាល​ប៉ុស្តិ៍​ផ្សារ​ដើមថ្កូវ​ដោះស្រាយ​តាមច្បាប់​៕ ​ ​ ​

ប្រភពៈ យប់មិញ