iPhone 5 ជាទូរស័ព្ទទំនើបស៊េរីចុងក្រោយរបស់ក្រុមហ៊ុន Apple សម្រាប់ពេលបច្ចុប្បន្ននេះ ហើយវាជាទូរស័ព្ទដែលថ្លៃបើធៀបនឹងទូរស័ព្ទទំនើបរបស់ក្រុមហ៊ុន ផ្សេងៗ ។ ចំណុចដែលប្រិយមិត្តគួរតែចាប់អារម្មណ៍មួយទៀតនោះគឺ លោកអ្នកប្រហែលជាធ្លាប់ដឹងហើយថា iPhone 5 ប្រៀបបាននឹង តួឯកក្នុងទីផ្សារ smartphones ទៅហើយ ។ ដូចអ្វីដែលប្រិយមិត្តធ្លាប់ឮមកហើយថាដើម្បីបន្ថែមនូវប្រណីតភាព នៃផលិតផលរបស់ក្រុមហ៊ុន Apple នោះ មានក្រុមហ៊ុនមួយចំនួនបានយកទូរស័ព្ទទាំងនោះមកធ្វើការរចនាជា ថ្មីដោយផលិតតួពីមាស និងដាំពេជ្រជាដើម ។ មិនថាតែ iPhone 5 នោះទេ តាមពិតរាល់ផលិតផលរបស់ Apple ជាពិសេសខ្សែស្រឡាយ iPhone តែម្ដងពេលវាចេញមកតែងតែធ្វើឲ្យរំជើបរំជួលនៅក្នុងទីផ្សារ smartphones ។ ពេល iPhone ចេញមកម្ដងៗវាពិតជាមានរូបរាងស្រស់ស្អាត និងមានគុណសម្បត្តិច្រើនណាស់ ប៉ុន្តែចំនុចទាំងនេះនៅតែមិនអាចបំពេញចិត្តរបស់អតិថិជនមួយ ចំនួននោះទេ ជាពិសេសក្រុមត្រកូលអភិជន ឬអ្នកមានដែលចូលចិត្តហក់លោត (high flyers) ។ ក្រុមទាំងនេះតែងតែចូលចិត្តតុបតែងលម្អទៅលើសម្ភារៈប្រើប្រាស់ របស់ខ្លួនដោយគ្រឿងមានតម្លៃផ្សេងៗដូចជាមាស ពេជ្រ ជាដើម ។ ដើម្បីបំពេញចិត្តអតិថិជនប្រភេទនេះ ក្រុមហ៊ុន Gold & Co. ធ្លាប់បានផលិតតួពិសេសធ្វើពីមាសសុទ្ធសម្រាប់ iPhone 5 ដោយឡែកសម្រាប់ពេលនេះមានសេចក្ដីរាយការថ្មីថាក្រុមហ៊ុន Stuart Hughes បានធ្វើការរចនានិងតុបតែងបន្ថែមនូវ iPhone 5 មួយគ្រឿងដែលមានតួធ្វើពីមាស ដាំពេជ្រពណ៌សតូចៗជាច្រើនដំ និង ពេជ្រខ្មៅមួយគ្រាប់ធំមានទំហំ 26 ការ៉ាត់ ដែលមានតម្លៃរហូតដល់ $14.5 លាន ។ គ្រាប់ពេជ្រមួយគ្រាប់ធំនេះត្រូវបានដាំនៅលើ home button ហើយចំណុចដែលពិសេសមួយទៀតនោះ គឺលោហ្គោរបស់ Apple នៅផ្នែកខាងក្រោយនោះត្រូវបានធ្វើពីមាសនិងមានដាំពេជ្រសគ្រាប់ តូចៗចំនួន ៥៣ គ្រាប់ ។
សូមបញ្ជាក់ផងដែរថាកាលពីមុនក្រុមហ៊ុន Stuart Hughes ក៏ធ្លាប់ធ្វើការរចនាតុបតែងនូវគ្រៀងលម្អដល់ផលិតផលរបស់ Apple ផងដែរដូចជា iPhone 3G មានតួធ្វើពីមាសតម្លៃ $2.5 លាន iPad 2 ដែលមានតួធ្វើពីមាសដែរ តម្លៃ $8 លាន ។ បើពិនិត្យលើតម្លៃទូរស័ព្ទទំនើប និងកុំព្យូទ័របន្ទះស្ដើងដែលធ្លាប់ចេញខាងលើ យើងអាចដឹងថា iPhone 5 ដែលមានតួផ្នែកខាងក្រោយធ្វើពីមាសនិងមានដាំពេជ្រជាច្រើន គ្រាប់នេះពិតជាមានតម្លៃថ្លៃជាងគេបង្អស់ ។
បញ្ជាក់៖ ទូរស័ព្ទទំនើប iPhone 5 ម៉ូដែលពិសេសនេះត្រូវបានដាក់លក់នៅក្នុងប្រទេសអង់គ្លេស ដោយលក់ក្នុងតម្លៃ $15 លាន ៕
ប្រភពៈ ពពក
