ប្រជពលរដ្ឋចោមរោមមើល សាកសពជនរងគ្រោះ ដែលត្រូវគេចាក់សម្លាប់, ជនសង្ស័យឈ្មោះសាទ បូរិន្ទ ហៅអាត្រសក់ (រូបតូច)
បន្ទាយមានជ័យ៖ ដោយសារតែចិត្តចងគំនុំអស់រយៈពេល ៥ថ្ងៃ ជនសង្ស័យម្នាក់ បានយកកាំបិតប្រវែង ២តឹក ចាក់ពីក្រោយសម្លាប់បុរសអនាថាម្នាក់ ស្លាប់ក្នុងប្លុកស្ថានីយ៍រថភ្លើងចាស់ទាំងល្ងាច ។ ប៉ុន្តែទីបំផុត ជនសង្ស័យរត់គេចខ្លួនបាន ២ម៉ោង ត្រូវសមត្ថកិច្ចនគរបាលក្រុងប៉ោយប៉ែត តាមប្រមាញ់ចាប់ខ្លួនបាន។តាមប្រភពពីកន្លែងកើតហេតុ បានឲ្យដឹងថា ជនរងគ្រោះមាន ឈ្មោះតូនី អាយុប្រមាណ៤៥ ឆ្នាំ ជាជនអនាថាមករស់នៅក្នុងតំបន់អនាធិបតេយ្យខាងលើ នៅមុនពេលកើតហេតុ វេលាម៉ោង ៤និង១០ នាទីល្ងាចថ្ងៃទី២១ ឆ្នាំ២០១៣ គេបានឃើញជនរងគ្រោះ និងជនសង្ស័យឈ្មោះសា ទបូរិន្ទហៅ(អាត្រសក់)ភេទប្រុស អាយុ២៩ឆ្នាំ ដែលទើបនឹងចេញពីគុកបាននាំគ្នាចូលក្នុងប្លុកស្ថានីយ៍រថភ្លើងចាស់ដែលទុក ចោលហើយជាកន្លែង សម្រាប់សេពគ្រឿងញៀនរបស់ពពួកអនាធិតេយ្យ យ៉ាងដុះស្លែ។ មួយសន្ទុះក្រោយមក ស្រាប់តែឃើញជនរងគ្រោះ បានរត់ចេញមកក្រៅ ស្រាប់តែជនសង្ស័យឈ្មោះសាទ បូរិន្ទ ហៅ(អាត្រសក់) បានយកកាំបិតចិតបន្លែប្រវែង ២តឹកចាក់ពីក្រោយ បណ្តាលឲ្យជនរងគ្រោះដួលប្រកាច់ស្លាប់មួយរំពេច។ ឯជនសង្ស័យរត់ចូលក្នុងវិញ និងបោះកាំបិតចោល រួចចេញទៅក្រៅបាត់ស្រមោល បន្សល់នូវជនសពជនរងគ្រោះដេកស្លាប់ ក្នុងថ្លុកឈាម យ៉ាងអណោចអធ័ម ។ឃើញបែបនេះ ប្រជាពលរដ្ឋក៏បានរាយការណ៍ទៅសមត្ថកិច្ចនគរបាល និងអាវុធហត្ថក្រុងប៉ោយប៉ែតភ្លាមៗផងដែរ។
ក្រោយពីការតាមប្រមាញ់ចាប់ខ្លួនជនដៃ អស់រយៈពេល ២ម៉ោង ទើបនគរបាលក្រុងប៉ោយប៉ែត ចាប់ឃាត់ខ្លួនជនសង្ស័យ បានតែម្តង។
លោកវរសេនីយ៍ត្រីអ៊ុំ សុផល អធិការនគរបាលក្រុងប៉ោយប៉ែត បានប្រាប់ឲ្យដឹងថា ឈ្មោះសាទ បូរិន្ទ ភេទប្រុស អាយុ ២៩ឆ្នាំ មានស្រុកកំណើតនៅភូមិ និងឃុំជប់វ៉ារីស្រុកព្រះនេត្រព្រះ ខេត្តបន្ទាយមានជ័យ។ បច្ចុប្បន្នស្នាក់ នៅក្រុងប៉ោយប៉ែតទីលំនៅមិនពិតប្រាកដ មុខរបរជាជាងសំណង់ ជាមនុស្សញៀនថ្នាំធ្លាប់ជាប់គុក៣ដងរួចមកហើយ ជាមុខសញ្ញាចោរលួចហើយទើបនឹងចេញពីគុក ។
នៅមុខសមត្ថកិច្ច ជនសង្ស័យបានសារភាពថា ពិតជាបានយកកាំបិតចិតបន្លែចាក់ត្រូវខ្នងមួយកាំបិត ដើម្បីសម្លាប់ជនរងគ្រោះពិតមែន ព្រោះតែខ្លួនមានទំនាស់ជាមួយជនរងគ្រោះ ៥ថ្ងៃមកហើយ លុះថ្ងៃកើតហេតុ ខ្លួនមកសេពគ្រឿងញៀននៅក្នុងស្ថានីយ៍រថភ្លើងចាស់ ដែលគេទុកចោលនោះ ក៏បានជួបជនរងគ្រោះទៀត។ ខ្លួនក៏បានចាក់ពីក្រោយខ្នងមួយកាំបិត រួចរត់គេចខ្លួន តែសំណាងមិនល្អ ក៏ត្រូវនគរបាលក្របួចជាប់តែម្តង។
វត្ថុតាងសាកសពជនរងគ្រោះបានគេចាត់ចែងបូជា ចំណែកជនដៃដល់សមត្ថកិច្ចកំពុងតែរៀបចំសំណុំរឿង បញ្ជូនទៅស្នងការខេត្តដើម្បីចាត់ការ បន្តទៅតាមនីតិវិធីច្បាប់។
ទន្ទឹមនិងការសសើរថ្វីដៃនៃការតាមចាប់ខ្លួនជនដៃដល់ របស់សមត្ថកិច្ចនគរបាលក្រុងប៉ោយប៉ែតនោះ ប្រជាពលរដ្ឋក៏បានរិះគន់ថា គេឃើញសមត្ថកិច្ចទាំងអាវុធហត្ថ និងនគរបាលក្រុងប៉ោយប៉ែត ប្រឹងប្រែងចាប់គ្រឿងញៀនណាស់ដែរ ហេតុអ្វីបានជាមិនចេះអស់សោះ ជាពិសេស នៅប្លុកអនាធិបតេយ្យស្ថានីយ៍រថភ្លើងចាស់ ដែលគេទុកចោលនោះ កំពុងតែក្លាយជាកន្លែងប្រកបដោយសុវត្ថិភាព សម្រាប់ក្រុមអនាធិបតេយ្យចែកចាយ និងសេពគ្រឿង ញៀនយ៉ាងត្រជាក់ចិត្តទៅហើយ ព្រោះគ្មានសមត្ថកិច្ចណាទៅរំខានឡើយ៕
ប្រភពៈ អង្គរធំ
