យុវជន ណុប ឥសាន ដែលជាគូដណ្ដឹង អុជធូបដោយទឹកមុខស្រងូតស្រងាត់នៅជិតសពក្មេងស្រីរងគ្រោះដែល លេបថ្នាំសម្លាប់ខ្លួនដោយសារតែឪពុកចាប់រំលោភ។ រូបថត ហុង មិនា
នៅក្នុងពិធីបុណ្យសពកាលពីម្សិលមិញ គេឃើញមានតែម្តាយសពក្មេងស្រីនិងយាយបង្កើត(ម្តាយជនសង្ស័យ)និង សាច់ញាតិខាងគូដណ្តឹងក្មេងស្រីប្រមាណ ៦-៧ នាក់ប៉ុណ្ណោះប៉ុន្តែមានប្រជាពលរដ្ឋជាច្រើនដែលបានស្តាប់វិទ្យុ ប៊ីប៊ីស៊ី បាននាំគ្នាយកបច្ច័យទៅចូលរួមពិធីបុណ្យសពក្មេងស្រីអភ័ព្វរូប នេះ។ អ្នកស្រី គន្ធាអាយុ ៣៣ ឆ្នាំ ជាម្តាយសពក្មេងស្រីរងគ្រោះ បានឲ្យដឹងថាក្រុមគ្រួសាររបស់អ្នកស្រី ស្នាក់នៅភូមិក្រពើហា ឃុំព្រែកឫស្សី ក្រុងតាខ្មៅ ខេត្តកណ្តាល។ អ្នកស្រីមានប្តីឈ្មោះសុខ ប៊ុនណារិន អាយុ ៣៧ ឆ្នាំ ជាមន្រ្តីប៉ូលិស នៅពន្ធនាគារខេត្តកណ្តាល។ អ្នកស្រីមានតែប្តីមួយនេះទេហើយមានកូន ៣ នាក់ គឺក្មេងស្រីរងគ្រោះ ឈ្មោះសុខ ស្រីពេជ្រ អាយុ ១៧ ឆ្នាំ នឹងកូនប្រុស ២ នាក់ទៀត។ ស្ត្រីរូបនេះនិយាយថា៖«ចំពោះការលេបថ្នាំសម្លាប់ខ្លួននេះខ្ញុំ មិនបានដឹងថាបណ្តាលមកពីអ្វីទេពីព្រោះមុនខ្ញុំនឹងប្តី ជាមួយកូនប្រុស ២នាក់ទៀតចេញទៅខេត្តព្រះសីហនុ កូនស្រីខ្ញុំមិនមានបញ្ហាអ្វីទេ»។
អ្នកស្រីគន្ធាបញ្ជាក់ថា អ្នកស្រីមានការតក់ស្លុត នៅពេលគេទូរស័ព្ទប្រាប់ថា កូនស្រីរបស់អ្នកស្រី បានលេបថ្នាំសម្លាប់ខ្លួន។ អ្នកស្រីបាននិយាយថា៖ «ខ្ញុំមានអារម្មណ៍សោកស្តាយដោយមិននឹកស្មានថា រឿងនេះឈានដល់ដំណាក់កាលហ្នឹងទេ»។
ស្រ្តីរូបនេះបានបន្តថា បើសិនប្តីរបស់អ្នកស្រី ចាប់រំលោភកូនខ្លួនឯងមែន អ្នកស្រីសុខចិត្តឲ្យប្តីរបស់អ្នកស្រីជាប់គុក។
ស្រ្តី ជាម្តាយរូបនេះ បានឲ្យដឹងថាកាលពីល្ងាចថ្ងៃចន្ទ កូនស្រីរបស់អ្នកស្រី បានដឹងខ្លួនបើកភ្នែក ហើយអាចនិយាយមួយម៉ាត់ៗ។ គ្រូពេទ្យក៏បានប្រាប់ថា នាងបានប្រសើរបន្តិចហើយ។ ប៉ុន្តែមិននឹកស្មានថា នាងបែរជាត្រូវស្លាប់សោះទៅវិញ។
យុវជន ណុប ឥសាន ដែលជាគូដណ្តឹងក្មេងស្រីរងគ្រោះ បានប្រាប់ថា រូបគេសប្បាយចិត្តនៅពេលឮគ្រូពេទ្យប្រាប់ថា ស្ថានភាពជំងឺគូដណ្តឹងរបស់ខ្លួនហាក់ប្រសើរបន្តិចហើយប៉ុន្តែក្រោយ មកដោយមានអ្នកជំងឺស្លាប់នៅក្នុងបន្ទប់មន្ទីរពេទ្យ ហើយមានសំឡេងយំសោកខ្លាំងផងនោះប្រហែលធ្វើឲ្យគូដណ្តឹងរបស់ខ្លួន មានអារម្មណ៍តក់ស្លុត រហូតដល់ស្លាប់។
ឥសានបានរំឭកថា៖«ខ្ញុំបានភ្ជាប់ពាក្យនឹងនាង ក្នុងអំឡុងខែធ្នូ ឆ្នាំ ២០១២ តែត្រូវផ្តាច់ពាក្យវិញដោយសាររឿងឪពុកចាប់កូនខ្លួនឯងរំលោភនេះ »។ ឥសានបានឲ្យដឹងថា ខ្លួនមានគម្រោងប្តឹងឪពុករំលោភកូនខ្លួនឯងនោះដែរតែត្រូវឪពុកនោះ ឃាត់មិនឲ្យប្តឹងដោយសុំឲ្យមានការសម្រួលគ្នាហើយក្រោយមកឪពុក នោះ បានបិទទូរស័ព្ទនិងរត់ទៅខេត្តព្រះវិហារបាត់ដោយនាំយកកូនប្រុសទី ២ ម្នាក់ ទៅជាមួយផង ប៉ុន្តែពេលនេះគាត់មកវិញហើយ។ ឥសានបានគូសបញ្ជាក់ថា៖ «ខ្ញុំចង់ឲ្យច្បាប់ដាក់ទោសឪពុកនោះទៅតាមអំពើដែលគាត់បាន ប្រព្រឹត្តមកលើកូនស្រីគាត់»។
អ្នកស្រី សុខ ប៊ុនថា អាយុ ៥៨ ឆ្នាំ នៅភូមិព្រែកសំរោង សង្កាត់តាខ្មៅ ស្រុកតាខ្មៅ ខេត្តកណ្តាលត្រូវជាម្តាយរបស់ឪពុកក្មេងស្រីរងគ្រោះបានឲ្យដឹងថា កូនប្រុសអ្នកស្រីឈ្មោះសុខ ប៊ុនណារិន អាយុជាង ៤០ ឆ្នាំ ត្រូវជាឪពុកបង្កើតរបស់សពក្មេងស្រីរងគ្រោះមិនមែនជាឪពុកចុងទេ ។ស្រ្តីរូបនេះនិយាយថា៖ «ករណីគេថា ឪពុករំលោភកូនខ្លួនឯងនេះ ខ្ញុំមិនដឹងថាជារឿងពិតឬយ៉ាងណាទេព្រោះកូនខ្ញុំធ្វើការជា ប៉ូលិស ហើយគេតែងតែនិយាយប្រាប់ខ្ញុំនិងរិះគន់ទៅលើបុរសចាប់រំលោភ ស្រ្តី តែពេលកើតរឿងបែបនេះឡើង ខ្ញុំហាក់មិនយល់ដែរ តែមិនដឹងថា ពិតឬមិនពិតនោះទេ ពីព្រោះទូរស័ព្ទវាបានបិទហើយក៏មិនដឹងគេនៅទីណាទេពេលនេះ»។
លោកយឹម សារ៉ាន់ អធិការនគរបាលខណ្ឌដង្កោ ថ្លែងថា សមត្ថកិច្ចកំពុងតែតាមរកជនសង្ស័យជាឪពុករូបនោះ។ លោកបន្តថា៖«តាមខ្ញុំសួរប្រពន្ធជនសង្ស័យថាគាត់រំលោភកូនស្រីនោះ បានម្តងហើយគាត់ជាមន្រ្តីប៉ូលិស នៅពន្ធនាគារខេត្តកណ្តាល»៕
ប្រភពៈ ភ្នំពេញប៉ុស្តិ៍
