រាជធានីភ្នំពេញ ៖ បុរសម្នាក់បើករថយន្តឡង់គ្រីស្ស័រ ពណ៌កណ្តុរប្រមេះ មកពីហូបការក្នុងស្ថានភាពស្រវឹងផង មកដល់មុខតូបប្រពន្ធលក់ដូរ អត់ឃើញប្រពន្ធ ខឹងពេកបើករថយន្តទៅបុកម៉ូតូគុបជ្រុង៥០ ពណ៌ទឹកប៊ិច មួយគ្រឿង ដែលចតនៅជិតតូបរបស់គាត់ ដោយសារតែម៉ូតូមួយគ្រឿងនេះ ឧស្សាហ៍ឌុបប្រពន្ធរបស់គាត់ដើរលេងពេក ។
ហេតុការណ៍នេះ កើតឡើងនៅវេលាម៉ោង ៧យប់ថ្ងៃទី២២ មេសា នៅមុខតូបលក់ដូរនៅតាមផ្លូវជាតិលេខ១ ក្នុងភូមិស្វាយតាអុក១ សង្កាត់វាលស្បូវ ខណ្ឌមានជ័យ ។
ប្រភពព័ត៌មានពីនគរបាលប៉ុស្តិ៍វាលស្បូវបានឲ្យដឹងថា ខណៈពេលដែលបុរសជាប្តីរបស់ស្រ្តីឈ្មោះ តឹក ណារី អាយុ២៧ឆ្នាំ មុខរបរលក់ដូរ ស្នាក់នៅកន្លែងកើតហេតុបានឲ្យដឹងថា ពេលដែលបុរសជាប្តីបើករថយន្តត្រឡប់មកពីហូបការវិញ មកដល់មុខតូបរបស់ប្រពន្ធលក់ដូរអត់ ឃើញប្រពន្ធនៅក្នុងតូប បែរជាឃើញតែម៉ូតូគុបជ្រុង៥០ ពណ៌ទឹកប៊ិច ដែលជាម៉ូតូរបស់មិត្តភក្តិរបស់ប្រពន្ធគាត់ ហើយតែងតែមកដឹកប្រពន្ធរបស់គាត់ទៅដើរលេង ។ លុះពេលមកដល់ ឃើញតែម៉ូតូអត់ឃើញប្រពន្ធនៅតូបលក់ដូរបែបនេះ ធ្វើឲ្យខឹង ក៏បើករថយន្តទៅបុកកំទេចមួយគ្រឿងនេះ ចោលតែម្តង បណ្តាលឲ្យខូចខាតស្ទើរទាំងស្រុង ។
ប្រភពដដែលបន្តទៀតថា បន្ទាប់ពីបុកម៉ូតូខូចខាតហើយ ទើបដឹងថាស្រ្តីជាប្រពន្ធដើរទៅលេង នៅផ្ទះអ្នកជិតខាងនោះ ចំណែកម៉ូតូមួយគ្រឿងខាងលើនេះ ម្ចាស់របស់គេដែលត្រូវជាមិត្តភក្តិ របស់ប្រពន្ធនោះ បានជិះមកហូបបង្អែមនៅតូបជិតតូបរបស់ប្រពន្ធលក់ដូរនោះទេ ។ ប៉ុន្តែទម្រាំ ដឹងខុសត្រូវនោះ បុរសជាប្តីបានប្រាប់ថា គាត់បួងចង្កូតមិនទាន់ទើបជ្រុលទៅបុកម៉ូតូបែបនេះ។
ទោះបីជាបែបណា ម្ចាស់ម៉ូតូមិនព្រមទេ ដោយចោទប្រកាន់បុរសខាងលើបើករថយន្តបុកម៉ូតូ របស់គាត់ដោយសារតែម៉ូតូរបស់គាត់នៅចិញ្ចើមផ្លូវហើយ ។
ក្រោយពេលកើតហេតុ ម្ចាស់ម៉ូតូបានទាមទារសំណងចំនួន ៦០០ដុល្លារ ដោយសារម៉ូតូរបស់គាត់ ខូចខាតស្ទើរទាំងស្រុងទៅ ហើយមិនយល់ព្រមទេ ទិញម៉ូតូមួយគ្រឿងទៀត ប្រហាក់ប្រហែលនឹងម៉ូតូនេះ សងគាត់ក៏បានដែរ ។
បច្ចុប្បន្ន ម៉ូតូ និងរថយន្ត ដែលរងការខូចខាត ត្រូវសមត្ថកិច្ចយកទៅរក្សាទុក នៅប៉ុស្តិ៍នគរបាលវាលស្បូវ រង់ចាំធ្វើការដោះស្រាយ ៕
ប្រភពៈ អង្គរធំ
