ប្រជាពលរដ្ឋខ្មែរនៅតែបន្ដធ្វើចំណាកស្រុក សម្រុកចូលទៅរកការងារធ្វើជាពលករនៅប្រទេសថៃ តាមច្រករបៀងនៃខេត្ដបន្ទាយមានជ័យ ជាខេត្ដមានព្រំប្រទល់ជាប់នឹង ប្រទេសថៃជាហូរហែរៀងរាល់ថ្ងៃ ។
ចលនានៃការធ្វើចំណាកស្រុករបស់ប្រជាពលករខ្មែរទៅរកការងារធ្វើនៅប្រទេសថៃដោយខុសច្បាប់ ទោះបីឋិតក្នុងសភាពប្រថុយប្រថានឬហានិភ័យផ្សេងៗទៀតក៏ដោយ ក៏ចលនានេះនៅតែកើតមានឥតដាច់ មិនខ្វល់នឹងការប្រកាសអំពាវនាវរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងអភិបាលខេត្ដបន្ទាយមានជ័យ ដែលសុំមិនឱ្យមានចំណាកស្រុកនោះឡើយ ។
ពលករខ្មែរចំណាកស្រុកទៅរកការងារធ្វើនៅប្រទេសថៃភាគច្រើន បាននិយាយឱ្យដឹងថា ទោះបីមានភាពប្រថុយប្រថានក្ដី ក៏ពួកគាត់សុខចិត្ដចំណាយលុយវគ្គដំបូងឱ្យក្រុមមេខ្យល់នាំតាមច្រករបៀង ទៅរកការងារធ្វើនៅប្រទេសថៃដែរ ព្រោះបានចំណូលគ្រាន់បើ ជាងធ្វើការនៅក្នុងប្រទេសកំណើត ដែលមានប្រាក់ឈ្នួលទាបផង បក្ខពួកនិយមផង និងលក្ខខណ្ឌការងារ យ៉ាប់យ៉ឺនផង ។ ពលករខ្លះទៀតនិយាយថា គាត់ក៏មិនចង់ធ្វើចំណាកស្រុកខ្មែរ តែថ្នាក់ដឹកនាំនិងអាជ្ញាធរកម្ពុជាចេះតែត្រឹមប្រ កាសអំពាវនាវ ប៉ុន្ដែមិនបានជួយអ្វីជាក់ស្ដែង ដើម្បីទ្រទ្រង់ដល់ជីវភាពរបស់ក្រុមគ្រួសារគាត់ទេ ក្រៅតែពីខ្លួនទីពឹងខ្លួនឯង ។
ការណ៍ដែលធ្វើចំណាកស្រុកខុសច្បាប់ចូលតាមច្រករបៀង តាមការដឹកនាំរបស់ក្រុមមេខ្យល់ទៅរកការងារធ្វើនៅប្រទេសថៃនោះ ត្រូវបានពលករខ្មែរចំណាកស្រុកបញ្ជាក់ថា បើមានលិខិតស្នាមពីខ្មែរក៏ទៅដល់ដីថៃ ត្រូវទំនាក់ទំនងជាមួយភាគីថៃដដែលជាដដែល ហើយធ្វើឯកសារនៅស្រុកខ្មែរត្រូវចំណាយលុយមួយថ្នាក់ទៀត ។ ដូច្នេះ ពួកគាត់សុខចិត្ដចំណាយលុយជាមួយសមត្ថកិច្ចថៃតែមួយថ្នាក់ជាការល្អជាងចំណាយលុយចំនួន២ថ្នាក់ ទាំងនៅខ្មែរទាំងនៅថៃ ។
ភ្ញៀវទេសចរដែលចេញចូលរវាងប្រទេសកម្ពុជានិងប្រទេសថៃ បាននាំគ្នាលាន់មាត់ថា ដូចជាពិបាកភ្នែកមើលដែរ ពេលឃើញ កម្មករអូសរទេះប្រើកម្លាំងអូសទាញដឹកទំនិញពីថៃចូលមកកម្ពុជាតាមច្រកទ្វារព្រំដែនអន្ដរជាតិប៉ោយប៉ែតរៀងរាល់ថ្ងៃយ៉ាងប្រសេចប្រសាច និងឃើញក្រុមពលករខ្មែរនាំគ្នាធ្វើដំណើរ ខ្លះពកូន ខ្លះលី យួរ ស្ពាយ អីវ៉ាន់តាមច្រករបៀងទៅរកការងារធ្វើនៅប្រទេសថៃបន្ដកន្ទុយគ្នាដូចសត្វកណ្ដៀរ ។
មជ្ឈដ្ឋានអ្នកវិភាគវិស័យការងារនៅកម្ពុជាបានលើកឡើងថា លក្ខខណ្ឌការងារនៅកម្ពុជាមានស្ថានភាពខុសគ្នា ឬអន់ខ្សោយជាង បើធៀបទៅនឹងប្រទេសថៃ ទើបមានពលករខ្មែរស្ម័គ្រចិត្ដប្រថុយប្រថានទៅរកការងារធ្វើនៅប្រទេសថៃទប់មិនឈ្នះ ។ ម្យ៉ាងទៀត អាជ្ញាធរយាមកាមនៅតាមច្រករបៀងក៏ទទួលបានផលប្រយោជន៍ ពីក្រុមមេខ្យល់ដែលនាំពលករខ្មែរ ធ្វើចំណាកស្រុកទៅរកការងារធ្វើនៅប្រទេសថៃដោយខុសច្បាប់ជាប្រចាំ ៕
សកម្មភាពចរាចរណ៍ពលករខ្មែរចំណាកស្រុកទៅការងារធ្វើនៅប្រទេសថៃតាមច្រករបៀងខុសច្បាប់
ទិដ្ឋភាពពលករខ្មែរចំណាកស្រុកទៅរកការងារធ្វើនៅប្រទេសថៃកកស្ទះពេលអាជ្ញាធរថៃបិទច្រកមួយចំនួន
ប្រភពៈ ដើមត្នោត
