ហេតុការណ៍ នេះបានកើតឡើងកាលពីវេលាម៉ោង៨និង២០នាទី ព្រឹកថ្ងៃទី២២ ខែមេសាឆ្នាំ២០១៣នៅតាមបណ្ដោយផ្លូវសហព័ន្ធរុស្ស៊ីត្រង់ចំណុចមុខ សាលាសង្គមវិទ្យា ស្ថិតក្នុងភូមិប៉ប្រកខាងត្បូងសង្កាត់កាកាប ខណ្ឌពោសែនជ័យ។
រថយន្ដដែលឆេះនោះម៉ាកទីតាន់ពណ៌ស្លាទុំ ពាក់ស្លាកលេខ ភ្នំពេញ 2E 0843 អ្នក បើកបរមានឈ្មោះ ស ឈន ភេទប្រុស អាយុ៣០ឆ្នាំ មុខរបរបើកបររថយន្ដដឹកឥដ្ឋការ៉ូដែលមានទីតាំងនៅម្ដុំស្ពានដែក ក្នុងសង្កាត់ដង្កោ ខណ្ឌដង្កោ អ្នកបើកបរក៏ស្នាក់នៅទីនោះដែរ។ រថយន្ដរងការខូចខាតឆេះខាងក្នុងកាប៊ីនទាំងស្រុងតែពុំមាន រងគ្រោះថ្នាក់ដល់មនុស្សណាម្នាក់ឡើយ។
តាម សាក្សីបាននិយាយថា មុនពេលកើតហេតុរថយន្ដនេះបានបើកបរក្នុងទិសដៅពីលិចទៅកើតនៅពេល មកដល់ចំណុចខាងលើស្រាប់តែមានផ្សែងហុយតិចៗចេញពីក្នុងម៉ាស៊ីន ផ្នែកខាងមុខឃើញដូច្នេះអ្នកបើកបរបានឈប់មើល ហើយនៅពេលបើកគំរបដំបូលមើលស្រាប់តែភ្លើងឆេះហុយពេញកាប៊ីន តែម្ដង។
ភ្លាមៗ នោះប៉ូលិសដែលឈរនៅគោលដៅម្ដុំនោះបានហៅរថយន្ដពន្លត់អគ្គិភ័យដែល ឈរប្រចាំការនៅសាលាខណ្ឌពោធិ៍សែនជ័យក្បែរនោះ ចេញជួយអន្ដរាគមន៍ទាន់ពេលវេលា។ ទោះជាយ៉ាងណាប៉ូលិសមិនបានយករថយន្ដនេះទៅទុកនៅប៉ុស្ដិ៍នោះទេ គឺបានប្រគល់ឲ្យទៅម្ចាស់គេវិញដើម្បីយកទៅជួសជុលប្រើប្រាស់៕
