រាជធានីភ្នំពេញ ៖ រថយន្តហ្វុយហ្សូ ពណ៌ស តៃកុងរថយន្តអះអាងថា បែកទុយោខ្យល់ ចាប់ហ្វ្រាំងអត់ស៊ី ជ្រុលចង្កូតទៅបុករះម៉ូតូ ៤គ្រឿង និងបុករទេះលក់លតឆាមួយគ្រឿង ក្រឡាប់ចាក់ចោលកណ្តាលថ្នល់ រងរបួសធ្ងន់ម្នាក់ ។
គ្រោះថ្នាក់នេះ កើតឡើងនៅវេលាម៉ោង៣ និង១០ នាទីរសៀលថ្ងៃទី២ មេសា នៅមុខហាងកាហ្វេ ណាលីន តាមផ្លូវលេខ២៧១ ក្នុងមណ្ឌល៥ សង្កាត់ទំនប់ទឹក ខណ្ឌ ចំការមន ។
ប្រភពព័ត៌មានពីកន្លែងកើតហេតុបានឲ្យដឹងថា រថយន្តហ្វុយហ្សូ អត់មានដឹកអ្វីទេ បើកបរក្នុងទិសដៅពីជើងទៅត្បូង ខណៈមកដល់ចំណុចខាងលើ បានបើកទៅបុកម៉ូតូសេ១២៥ ពណ៌ក្រហម បើកបរដោយបុរសម្នាក់ នៅចិញ្ចើមផ្លូវ បណ្តាលឲ្យដួលរងរបួសធ្ងន់ រួចហើយរថយន្ត បើកទៅបុករទេះលក់លតឆា ឈប់ចតនៅពីមុខហាងកាហ្វេណាលីនធ្វើឲ្យក្រឡាប់ចាក់ចោល លតឆានិងរបស់របរនៅលើរទេះ ខូចខាតអស់រលីង ហើយរថយន្តនៅមិនទាន់អស់ល្បឿនទៀត បានជ្រុលទៅបុករះម៉ូតូ ៣គ្រឿងចតនៅមុខហាងកាហ្វេដួលគរលើគ្នា ក្នុងចំណោមម៉ូតូ ៣គ្រឿង រួមមាន ម៉ូតូសង់ចិនពណ៌ខ្មៅ ម៉ូតូវីវ៉ា ពណ៌ខ្មៅ និងម៉ូតូស្កុបពី ពណ៌ឈាមជ្រូក ។
ចំណែកតាមការអះអាងរបស់អ្នកបើករថយន្តបង្ក បានឲ្យដឹងថា ដោយសារតែរថយន្តរបស់គាត់ បែកទុយោខ្យល់ ធ្វើឲ្យជាន់ហ្វ្រាំងមិនស៊ី ទើបជ្រុលទៅបុកម៉ូតូ ៤គ្រឿង និងរទេះលក់លតឆាក្រឡាប់អស់មួយគ្រឿងបែបនេះ ។
ក្រោយពេលកើតហេតុ ជនរងគ្រោះរបួសធ្ងន់ ត្រូវរថយន្តសង្គ្រោះដឹកយកទៅព្យាបាល នៅមន្ទីរពេទ្យមិត្តភាពខ្មែរសូវៀត ចំណែករថយន្ត និងម៉ូតូរងគ្រោះទាំង ៤គ្រឿង ព្រមទាំងរទេះលក់លត ឆា ត្រូវសមត្ថកិច្ចយកទៅធ្វើការដោះស្រាយ នៅអធិការដ្ឋានខណ្ឌចំការមន ៕
ប្រភពៈ អង្គរធំ
