រាជធានីភ្នំពេញ ៖ បុរសជនជាតិបរទេសម្នាក់ ជិះម៉ូតូលឿនពេក ចាប់ហ្វ្រាំងមិនទាន់ ជ្រុលទៅបុកម៉ូតូមួយគ្រឿងទៀត ក្នុងទិសដៅច្រាសគ្នា ខណៈពេលដែលម៉ូតូនោះ បត់ឆ្វេងបណ្តាលឱ្យដួលសន្លប់មួយសន្ទុះ ដឹងខ្លួនវិញ ក្រោករករឿងថា ជិះម៉ូតូអត់មើល ទើបបណ្តាលឲ្យបុកគ្នាបែបនេះ បានទាមទារសំណង ២០០ដុល្លារ ដើម្បីព្យាបាលរបួស ។
គ្រោះថ្នាក់នេះ កើតឡើងនៅវេលាម៉ោង ៩និង ៣០នាទីព្រឹកថ្ងៃទី១ មេសា នៅចំណុចផ្លូវលេខ ៣៦០ កែង៩៥ មុខភោជនីយដ្ឋានជួបលាភ ក្នុងសង្កាត់បឹងកេងកងទី៣ ខណ្ឌចំការមន ។
ប្រភពព័ត៌មានពីកន្លែងកើតហេតុ បានឲ្យដឹងថា ជនជាតិបរទេសជិះម៉ូតូស្តេប ពណ៌ក្រហម ជិះ តាមផ្លូវលេខ៣៦០ ពីលិចទៅកើត ចំណែកម៉ូតូគុបជ្រុង៩០ ពណ៌ស្លែ បើកបរដោយស្រ្តីម្នាក់ ក្នុងទិសដៅពីកើតទៅលិច ខណៈមកដល់ចំណុចផ្លូវកែង ម៉ូតូគុបជ្រុងបត់ឆ្វេង ស្រាប់តែម៉ូតូស្តេបជិះលឿនពេក ចាប់ហ្វ្រាំងមិនទាន់ ជ្រុលទៅបុកគូទម៉ូតូគុបជ្រុងដែលកំពុងតែបត់ បណ្តាលឲ្យម៉ូតូដួលទាំងពីរគ្រឿង ។ ដោយឡែក ស្រ្តីអ្នកបើកម៉ូតូគុបជ្រុង៩០មិនមានរងរបួសទេ រីឯជនជាតិបរទេសសន្លប់មួយសន្ទុះដឹងខ្លួនវិញ ស្រែកឡូឡាថា ជិះម៉ូតូអត់មើលឃើញម៉ូតូរបស់គាត់ ជិតមកដល់ហើយ នៅតែបត់ទៀត ទើបបណ្តាលឲ្យគាត់បុកបែបនេះ ។
ស្រ្តីជិះម៉ូតូគុបជ្រុង មានឈ្មោះ ចាន់ សុគន្ធារី អាយុ ២៩ឆ្នាំ ស្នាក់នៅផ្ទះលេខ 78E3 ផ្លូវលេខ១២៦ សង្កាត់ផ្សារថ្មីទី២ ខណ្ឌដូនពេញ មិនមានរងរបួសទេ រីឯជនជាតិបរទេសរលាត់ដៃជើង និងថ្លោះចង្កេះ បានទាមទារសំណង ២០០ដុល្លារ ។ អ្នកបើកម៉ូតូគុបជ្រុង មិនព្រមសុខចិត្តសងសំណង ៥០ដុល្លារ ដោយលើកឡើងថា ជិះម៉ូតូបុកគាត់ ហើយទាមទារសំណងទៀត ៕
ប្រភពៈ អង្គរធំមេឌែ
