អ្នកប្រដាល់ខុន រាជ ក្លឹបកងពលធំអន្តរាគមន៍លេខ ៣ ប្រកាសវ៉ៃជាមួយអ្នកប្រដាល់ សាយ័ន្ដ អាងកម្លាំងបាយសរ សី ក្លឹបក្រសួងការពារជាតិលើសង្វៀន CTN ថ្ងៃទី១២មេសានេះ ។ អ្នកប្រដាល់ទាំង ២ រូបនេះបាត់មុខពីសង្វៀនយូរដូចគ្នា ហើយទើបនឹងត្រឡប់មករកការប្រកួតវិញដូចគ្នា ។ ការវិលត្រឡប់មកវិញនេះពួកគេវ៉ៃបានមួយប្រកួតដូចគ្នា ហើយបរាជ័យដូចគ្នា ។ សរ សីមិនសូវមានស្នៀត អាងកម្លាំងបាយមែន តែគេមានចិត្តធំ ។ ចំពោះខុន រាជមានផ្លែវ៉ៃល្អ តែចិត្តមិនសូវធំទេ បើគូប្រកួតខ្លាំងជាង ល្អជាង គេ លែងសូវហ៊ានវាយលុក ដោយនៅចាំការពារច្រើនជាងទៅវិញ ។ សរ សីមានតែកណ្ដាប់ដៃ ហើយវ៉ៃមិនច្បាស់ទៀតផង តែអ្នកប្រដាល់រូបនេះ គូប្រកួតវ៉ៃត្រូវ គេកាន់តែចូលទោះ បីការសម្រុកចូលនោះទទួលរងការវាយប្រហារយ៉ាងណាក៏ដោយ ។ ចំពោះខុន រាជជង្គង់ និង កែងគេល្អ តែបើគូប្រកួតសម្រុកមិនឈប់ទេនោះ គេខ្លាចតែម្ដង ។ ខុន រាជ និង សរ សីនរណាជាអ្នកទទួលបានជ័យជម្នះក្នុងការប្រកួតនេះ ? នេន វណ្ណា ក្លឹបកងពលធំអន្តរាគមន៍លេខ ៣ ដែរនោះ ប្រកួតជាមួយអ្នកប្រដាល់សុខ ចិន្ដា មកពីក្លឹបឃ្លាំងមឿងកីឡា ។ នេះជាការជួបគ្នាលើកដំបូងហើយរបស់អ្នកប្រដាល់ទាំង ២ រូបនេះ ។វណ្ណល្អកែង និង ជង្គង់ តែចលនាវ៉ៃ របស់គេយឺត ។ចំពោះចិន្ដាកម្ពស់គេទាបជាងវណ្ណាទេ តែគេវ៉ៃបានរហ័ស និង បន្លាស់ទីបានលឿនដែលគូប្រកួតលំបាកនឹងវាយប្រហារគេណាស់ ។ ពួកគេសុទ្ធតែមានឱកាសដើម្បីឈ្នះដូចគ្នា តែមិនដឹងថានរណាជាអ្នកមានសំណាងនោះឡើយ តែរវាងអ្នកឈ្នះ និង អ្នកចាញ់សុទ្ធតែទ្រមខ្លួនដូចគ្នាមិនខាន ។ សម្រាប់ថ្ងៃសៅរ៍ទី១៣មេសាវិញនោះលើសង្វៀន CTN នេះដែរ រឿម វណ្ណៈក្លឹបក្រសួងការពារជាតិ និង វ៉ាន់ ចាន់វ៉េត ក្លឹបសឹង្ហកីឡាណាត់គ្នាជម្រះបញ្ជី ។ អ្នកប្រដាល់ទាំង ២ រូបនេះធ្លាប់ជួបប្រកួតគ្នា២-៣ លើកហើយ តែការប្រកួតភាគច្រើនចាន់វ៉េតជាអ្នកឈ្នះ តែការជួបគ្នាចុងក្រោយនៃព្រឹត្តិការណ៍វ៉ៃដណ្ដើមប្រាក់ក្នុងធនាគារ របស់សង្វៀន TV3 នោះវណ្ណៈជាអ្នកឈ្នះចាន់វ៉េត ។ សម្រាប់ការជួបគ្នាលើកនេះមិនដឹងថានរណាជាអ្នកឈ្នះនោះទេ ។ចាន់វ៉េតល្អជង្គង់ និងពូកែធាក់មិនឲ្យគូប្រកួតចូលកៀកខ្លួនបាន តែគេមិនសូវវាងវៃទេ ។ ចំពោះវណ្ណៈគេជាអ្នកវ៉ៃប្ដូរកែងដោយគ្មានញញើត ។ បើគូប្រកួតខ្លាំងជាងទោះមួយចានទឹកមួយចានគោកក៏គេប្ដូរដែរ គឺមិនទុកឲ្យគូប្រកួតក្រអឺតក្រទមដេញវាយគេតាមអំពើចិត្តឡើយ ។ យឹម ឌៀប ក្លឹបក្រសួងការពារជាតិ ប្រកួតជាមួយហេង វិឆ័យ ក្លឹបកងពលតូចលេខ ៧០ ដែលនេះជាការប្រកួតគ្នាដ៏កម្ររបស់ពួកគេទាំង ២ ។ វិឆ័យល្អជង្គង់ និង កែងមែន តែកណ្ដាប់ដៃយឹម ឌៀបនឹងធ្វើឲ្យវិឆ័យលំបាកនឹងបញ្ចេញអាវុធ ។ ការប្រកួត នេះយឹម ឌៀបមានសង្ឃឹមឈ្នះច្រើនជាងវិឆ័យ៕
