កំពង់ធំ៖ គ្រោះថ្នាក់ចរាចរមួយ បានកើតឡើង កាលពីវេលាម៉ោង៤និង៣០នាទីទៀបភ្លឺ ព្រឹកថ្ងៃទី ១ ខែមេសា ឆ្នាំ២០១៣ នៅលើផ្លូវជាតិ៧១ កំពង់ធំ កំពង់ចាមចំណុចភូមិបាល្ល័ង្គ ឃុំបាល្ល័ង ស្រុកបារាយណ៍ ខេត្តកំពង់ធំ រវាងរថយន្ដហ៊ីយ៉ាន់ដាយ ពាក់ស្លាកលេខ ភ្នំពេញ 3A-5486 ចំណុះ៥តោន ដឹកចុងអង្ករ បានបុកជាមួយម៉ូតូសង់កូរ៉េក្រឡាប់ផ្ងារធ្លាក់ផ្លូវ ។ នគរបាលដែលចុះ ទៅដល់កន្លែងកើតហេតុ និយាយថា មុនពេលកើតហេតុ គេឃើញរថយន្ដ ហ៊ីយ៉ាន់ដាយបើកបរបញ្រ្ចាសទិសជាមួយម៉ូតូ ហើយបានរេចង្កូតមកបុកម៉ូតូបណ្ដាលឲ្យ ក្រឡាប់ផ្ងារធ្លាក់ផ្លូវតែម្ដង ។
នគរបាលបានបន្តថា អ្នកបើករថយន្ដបើក គេចខ្លួនបាត់ ត្រូវបានព្រូឡានប្រាប់ថាឈ្មោះ ថេង ភេទប្រុស អាយុ៣៩ឆ្នាំ មិនដឹងរស់ឯណាទេ ។ រីឯអ្នកជិះម៉ូតូឈ្មោះជិន យ៉ុង ភេទ ប្រុស អាយុ៣០ឆ្នាំ រស់នៅភូមិវាលស្ព័រ ឃុំគគីរធំ ស្រុកបារាយណ៍ ខេត្តកំពង់ធំ បានរងរបួសធ្ងន់ ហើយត្រូវបានគេដឹកជួយសង្រ្គោះបន្ទាន់នៅមន្ទីរពេទ្យបង្អែកបារាយណ៍ ។
សមត្ថកិច្ច បាននាំព្រូឡានពីរនាក់សួរនាំ ដល់ពេលថ្ងៃត្រង់ ប្រភពព័ត៌មានបានឲ្យដឹងថា ម្ចាស់រថយន្ដបាន ចេញមកសម្របសម្រួល ជួយចេញថ្លៃព្យាបាល ជនរងគ្រោះ និងការខូចខាតម៉ូតូ ជនរងគ្រោះផងដែរ ៕
ប្រភពៈ ដើមអម្ពិល
