ទោះបីជាបែបណា ការកំណត់អត្តសញ្ញាណជនដែលត្រូវសម្លាប់នោះជាឃាតករនៅមិនទាន់ ច្បាស់ការណ៍នៅឡើយ ទេ ទោះជាប្រភពខ្លះអះអាងថា គឺជាការអះអាងរបស់អ្នកស្រីសន សុម៉ាឡែន ដែលរងរបួសបានកំណត់ថា ជននោះគឺជាឃាតករក្តីតាមរយៈការបង្ហាញរូបថត ។ ថ្វីបើបែបនេះក្តី នៅរសៀលថ្ងៃទី១១ មេសា ជនសង្ស័យម្នាក់កំពុងត្រូវបានតាមប្រមាញ់ដោយប្រភពខ្លះថាគឺជា ឃាតករ និងប្រភពខ្លះថាអាចជាអ្នកជួល ។
ខាងក្រោមនេះគឺជាហេតុការណ៍នានាទាក់ទិននឹងការស្លាប់របស់ស្ត្រីរងគ្រោះ និងជនដែលសង្ស័យត្រូវគេវាយសម្លាប់ ។
សេចក្តី រាយការណ៍បានឱ្យដឹងថា ជនរងគ្រោះដែលគេព្រួតវាយនឹងដំបងផុងលលាដ៍ក្បាលរហូតដល់ស្លាប់ កាលពីវេលាម៉ោង១០ និង៣០នាទីយប់ ថ្ងៃទី៩ មេសា ស្ថិតនៅគីឡូម៉ែត្រលេខ៣ ក្នុងភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ពិតជាត្រូវបានគេសង្ស័យថាជាឃាតករបាញ់ប្រហារទៅលើស្ត្រីជា បុគ្គលិកធនាគារកាណាឌីយ៉ាសាខាកំបូល និងក្មួយប្រុសអាយុជាង១ខួបស្លាប់ ព្រមទាំងបងស្រីរងរបួសបាក់ជើង ។
ប្រភពព័ត៌មាននោះបានអះ អាងថា បន្ទាប់ពីមានការបាញ់ប្រហារ កាលពីវេលាម៉ោង៥ និង៥០នាទីល្ងាច ថ្ងៃទី៨ មេសា នៅក្នុងបុរីញូវថោន ស្ថិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ដែលបណ្តាលឱ្យស្ត្រីឈ្មោះទិត្យ ធារ៉ា អាយុ២៦ឆ្នាំ និងក្មួយប្រុសឈ្មោះឡយ យុទ្ធារ៉ា ហៅទិត្យ យុទ្ធារ៉ា អាយុជាង១ខួប ស្លាប់ ព្រមទាំងម្នាក់ទៀតជាបងស្រីឈ្មោះសន សុម៉ាឡែន អាយុ៣២ឆ្នាំ របួសបាក់ជើង មានគេសង្ស័យថា ឃាតករជាយុវជនម្នាក់រស់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ឈ្មោះវ៉ាន់ ចិត្រា ហៅអូន ភេទប្រុស អាយុ២១ឆ្នាំ ជាជាងជួសជុលម៉ូតូនៅគីឡូម៉ែត្រលេខ៤ ។
ប្រភព ព័ត៌មានបន្តថា ក្រោយពីបាញ់ប្រហាររួច ឃាតករបានមកកាន់ខេត្តស្ទឹងត្រែងដែលជាស្រុកកំណើតរបស់ខ្លួន និងដើម្បីទារប្រាក់ថ្លៃឈ្នួលក្នុងហេតុការណ៍បាញ់ប្រហារនោះ តែស្របពេលជនសង្ស័យជាឃាតករមកទារថ្លៃឈ្នួលក៏មានជនមិន ស្គាល់មុខផ្សេងទៀតបានវាយសម្លាប់នៅនឹងកន្លែងដើម្បីបំបិទមាត់ ។
លោក ដួង ស៊ីវុត្ថា នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ដ ឱ្យដឹងនារសៀលថ្ងៃទី១១ មេសា ថា ជនរងគ្រោះដែលគេព្រួតគ្នាវាយនឹងដំបងស្លាប់នៅនឹងកន្លែងកាលពី វេលាម៉ោង១០និង៣០នាទីយប់ ថ្ងៃទី៩ មេសា នៅគីឡូម៉ែត្រលេខ៣ ក្នុងភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ត្រូវបានថ្នាក់លើឱ្យបញ្ជូនរូបថតជនរងគ្រោះទៅស្នងការភ្លាមៗ ដោយសង្ស័យថា ជនរងគ្រោះដែលស្លាប់បាត់បង់ជីវិតនៅខេត្ដស្ទឹងត្រែងជាឃាតករ ។ លោកឱ្យដឹងទៀតថា ពេលនេះសមត្ថកិច្ចកំពុងស្រាវជ្រាវយ៉ាងដុតដៃដុតជើងស្វែងរក ជនដៃដល់ដែលសម្លាប់ឈ្មោះ វ៉ាន់ ចិត្រា ហៅអូន ភេទប្រុស អាយុ២១ឆ្នាំ ដោយជនដៃដល់ទាំងនោះត្រូវបានកំណត់មុខសញ្ញារួចហើយ និងកំពុងតែស្វែងរកចាប់ខ្លួន ។
លោកនាយការិយាល័យព្រហ្ម ទណ្ឌកម្រិតធ្ងន់បន្ដថា មុនកើតហេតុ គេឃើញជនរងគ្រោះ និងមនុស្សប្រុស៣នាក់ទៀតជជែកគ្នាតឹងសរសៃក ក្រោយមកក៏មានការប្រទាញប្រទង់ រួចជនមិនស្គាល់មុខ៣នាក់នោះ បានព្រួតវាយជនរងគ្រោះ ព្រមទាំងយកដំបងវាយក្បាលពីក្រោយបណ្តាលឱ្យស្លាប់ភ្លាម រួចគេឃើញអូសសពពីកន្លែងកើតហេតុទៅចោលនៅក្រោមដើមក្រខុបចម្ងាយ ប្រមាណជាង៥ម៉ែត្រ ពីកន្លែងកើតហេតុបន្ទាប់មកជនដៃដល់បានរត់គេចខ្លួនបាត់ស្រមោល អស់ ។
ប្រភពព័ត៌មានមួយទៀតបង្ហើបឱ្យដឹងថា ជនរងគ្រោះឈ្មោះវ៉ាន់ ចិត្រា ហៅអូន នៅមុនពេលត្រូវគេវាយសម្លាប់នោះគឺបានអង្គុយផឹកស៊ី ជាមួយបក្សពួករបស់ខ្លួនចំនួនបីទៅបួននាក់ទៀត ។ ក្រោយពីផឹកស៊ីរួច គេបានបណ្ដើរគ្នាតាមចិញ្ចើមផ្លូវមកដល់ចំណុចខាងលើត្រូវក៏ គេព្រួតគ្នាវាយរហូតដល់ស្លាប់នៅនឹងកន្លែង រួចអូសសពទៅចោលនៅក្បែរដើមក្រខុបឆ្ងាយពីកន្លែងកើតហេតុ ជាង៥ម៉ែត្រ ហើយជនដៃដល់ក៏បានរត់គេចខ្លួនបាត់អស់ ។ បច្ចុប្បន្នជនដៃដល់ជាប់ពាក់ព័ន្ធក្នុងការរួមគំនិតគ្នាវាយ សម្លាប់នេះកំពុងរត់គេចខ្លួន ឯសមត្ថកិច្ចក៏កំពុងតាមដានយ៉ាងម៉ត់ចត់ផងដែរ ។
តាម លោកគឹម វ៉ាន់ អតីតទាហានការិយាល័យ«ក២» នៃតំបន់ប្រតិបត្តិការសឹងរងខេត្តស្ទឹងត្រែង និងភរិយារបស់លោកដែលជាឪពុកម្ដាយរបស់ឈ្មោះវ៉ាន់ ចិត្រា និយាយថា មុនថ្ងៃកើតហេតុជាងកន្លះខែកូនប្រុសរបស់គាត់មិនដែលទៅណា ចេញពីខេត្តស្ទឹងត្រែងទេ គឺនៅជួសជុលម៉ូតូរហូតតែមិនដឹងថា មានគំនុំអ្វីនឹងគេទើបគេវាយដល់ស្លាប់បែបនេះទេ ។ តាមការបំភ្លឺនេះបង្ហាញថា បើមានការសង្ស័យថា ជាឃាតករបាញ់សម្លាប់មនុស្សនៅភ្នំពេញញគួរតែបាត់មុខមួយរយៈ នៅខេត្តស្ទឹងត្រែង ៕
ប្រភព everday.com.kh
