ភ្នំពេញ: អតីតប្រមុខរដ្ឋខ្មែរក្រហម លោក ខៀវ សំផន បានស្នើសុំឲ្យតុលាការកាត់ទោសអតីតមេដឹកនាំជាន់ខ្ពស់ខ្មែរក្រហម ដោះលែងរូបលោក ចេញពីការឃុំឃាំង ដែលមានរយៈពេលជាង ៥ ឆ្នាំមកហើយ។ លោក ខៀវ សំផន បានថ្លែងដូច្នេះផ្ទាល់មាត់ នៅក្នុងសវនាការ កាលពីរសៀលថ្ងៃទី១១ ខែមេសា ឆ្នាំ២០១៣។ ក្នុងអង្គសវនាការ លោក ខៀវ សំផន អាយុ ៨១ ឆ្នាំ បានថ្លែងថា រូបលោក មិនមានលិខិតឆ្លងដែនទេ។ លោកចង់ចេញពីបន្ទប់ឃុំឃាំងរបស់តុលាការខ្មែរក្រហម ហើយទៅរួមរស់ ជួបជុំប្រពន្ធ និងកូនៗរបស់លោក នៅក្នុងផ្ទះល្វែងមួយ។ លោក ខៀវ សំផន ក៏បានថ្លែងសន្យាថា នឹងគោរពតាមលក្ខខណ្ឌរបស់តុលាការខ្មែរក្រហម ហើយនឹងចូលខ្លួនទៅបង្ហាញវត្តមាន នៅពេលតុលាការ កោះហៅរូបលោក។ ចំណែកមេធាវីការពារក្ដីជនជាប់ចោទ ខៀវ សំផន គឺលោក អាទើរ វែកិន ( Arthur Vercken ) ក៏បានលើកឡើង ក្នុងអង្គសវនាការ ដោយស្នើសុំអង្គជំនុំជម្រះសាលាដំបូង របស់តុលាការខ្មែរក្រហម ដោះលែងលោក ខៀវ សំផន តាមលក្ខខណ្ឌ ដាក់ឲ្យស្ថិតនៅក្រោមការត្រួតពិនិត្យរបស់តុលាការ។ មេធាវីលើកហេតុផលថា លោក ខៀវ សំផន បានជាប់ឃុំឃាំង នៅសាលាក្ដីខ្មែរក្រហមអស់រយៈពេល ៥ឆ្នាំ និង ៤ខែ មកហើយ ហើយមិនដឹងថានៅពេលណាទើបសាលាក្ដីកូនកាត់នេះ ជំនុំជម្រះចប់ ហើយចេញសាលក្រម លើសំណុំរឿង០០២ ឡើយ។ លោកសហមេធាវីបរទេស ការពារលោក ខៀវ សំផន ក៏បានបន្ថែមថា តុលាការ អាចដាក់ឱ្យលោក ខៀវ សំផន ស្ថិតនៅក្រោមការត្រួតពិនិត្យតាមផ្លូវតុលាការ ដោយធានាថា មិនមានការប៉ះពាល់ដល់សណ្ដាប់ធ្នាប់សាធារណៈកម្ពុជា និងឱ្យមានការធានាថា លោក ខៀវ សំផន នឹងមានវត្តមានដូចដែលគាត់ធ្លាប់មាននៅទីនេះ។ ដូច្នេះ គាត់នឹងមានវត្តមានតទៅទៀត ហើយយើងក៏ផ្ដល់នូវកិច្ចសន្យាជាលាយលក្ខណ៍អក្សររបស់គាត់ថា គាត់សន្យាថា នឹងមានវត្តមាននៅក្នុងគ្រប់សវនាការនៅតុលាការនេះ។ លោកមេធាវី បានបន្ថែមថា ប្រសិនបើតុលាការដោះលែងលោក ខៀវ សំផន នោះលោកមេធាវីធានាថា កូនក្ដីលោក នឹងមិនផ្លាស់ប្ដូរទីលំនៅ ដោយមិនប្រាប់តុលាការទេ ហើយលើសពីនេះ លោក ខៀវ សំផន ក៏នឹងមិនទាក់ទងជាមួយអ្នកកាសែត ឬសាក្សីឡើយ។ ដូច្នេះការដោះលែងនេះ ក៏នឹងមិនមានហានិភ័យចំពោះការរត់គេចខ្លួនដែរ។ ក៏ប៉ុន្តែភាគីសហព្រះរាជអាជ្ញា បានលើកហេតុផល មកជំទាស់ទៅនឹងការស្នើសុំដោះលែងលោក ខៀវ សំផន។ ភាគីសហព្រះរាជអាជ្ញា បានអះអាងថា ការបន្តឃុំខ្លួនលោក ខៀវ សំផន ជាវិធានការចាំបាច់ ដើម្បីរក្សាសណ្ដាប់ធ្នាប់សង្គម ការពារដល់សន្តិសុខជនជាប់ចោទ ឲ្យរួចផុតអំពើហឹង្សា និងការពាររងគ្រោះ ដែលនៅតែមានការបាក់ស្បាតនៅឡើយ។ បន្ទាប់ពីស្តាប់នូវអំណះអំណាងខាងលើរួចមក អង្គជំនុំជម្រះសាលាដំបូង មិនទាន់បានសម្រេច ថាត្រូវដោះលែងលោក ខៀវ សំផន ឬបន្តឃុំខ្លួនលោក នៅតុលាការខ្មែរក្រហម នៅឡើយទេ។ លោកចៅក្រម និល ណុន ប្រធានអង្គជំនុំជម្រះ សាលាដំបូង របស់តុលាការខ្មែរក្រហម បានប្រកាសថា សេចក្ដីសម្រេចលើការស្នើសុំដោះលែងលោក ខៀវ សំផន នឹងត្រូវប្រកាស នៅពេលសមស្របខាងមុខ។ សូមរម្លឹកថា បន្ទាប់ពីលោក ខៀវ សំផន ត្រូវបានចាប់ ឃុំខ្លួនជាបណ្តោះអាសន្ន នៅតុលាការខ្មែរក្រហម កាលពីថ្ងៃទី១៩ ខែវិច្ឆិកា ឆ្នាំ២០០៧ ក្រោយមកបន្តិច លោក ខៀវ សំផន បានប្តឹងជំទាស់ ហើយស្នើសុំតុលាការឲ្យដោះលែងរូបលោក។ តែកាលណោះ សាលាក្តីខ្មែរក្រហម បានបដិសេធ ហើយបន្តឃុំខ្លួនលោក ខៀវ សំផន មកដល់សព្វថ្ងៃ។ សាលាក្តីខ្មែរក្រហម នឹងបន្តសវនាការរបស់ខ្លួនឡើងវិញ នៅថ្ងៃចន្ទ ទី២២ ខែមេសា ឆ្នាំ២០១៣ បន្ទាប់ពីបញ្ចប់ការស្ដាប់សក្ខីកម្មរបស់សាក្សី លោក ហ្វ្រង់ស្វ័រ ពុងសូ ( Francois Ponchaud ) ពាក់ព័ន្ធការជម្លៀសប្រជាជនកម្ពុជាដោយបង្ខំ ចេញពីភ្នំពេញ នៅពេលខ្មែរក្រហម ឡើងកាន់អំណាច ថ្ងៃទី១៧ ខែមេសា ឆ្នាំ១៩៧៥៕
cen.com.kh
