ព្រះសីហនុ៖ បុរសជនជាតិបារាំងម្នាក់ ជាវេជ្ជបណ្ឌិត ត្រូវបានគេឃើញស្លាប់ នៅក្នុងបឹងកាឡូសុខសាន្ត ស្ថិតនៅក្រុម៣ ភូមិសុខសាន្ត សង្កាត់កោះរុង ក្រុង-ខេត្តព្រះសីហនុ ។
តាមរយៈការពិនិត្យបឋម របស់នគរបាលបច្ចេកទេសវិទ្យាសាស្រ្ត និងលោកវេជ្ជបណ្ឌិត សែជូ សិទ្ធិជោត អនុប្រធានមន្ទីរសុខាភិបាល ខេត្ត ព្រះសីហនុ បានបញ្ជាក់ឲ្យដឹងថា ជនរងគ្រោះ (សព) ស្លាប់នៅវេលាម៉ោងប្រហែល ៤និង០០នាទី ទៀបភ្លឺ ថ្ងៃទី០១ ខែមេសា ឆ្នាំ២០១៣ ដោយធ្វើអត្តឃាត (ប្រើថ្នាំចាក់បញ្ចូលតាមសរសៃដៃខាងស្តាំ) ។ សពត្រូវបានប្រគល់ទៅឲ្យមិត្តភក្តិ និងតំណាងកុងស៊ុលបារាំង ប្រចាំខេត្ត ព្រះសីហនុ ដឹកតាមរថយន្តមន្ទីរពេទ្យបង្អែក ខេត្តព្រះសីហនុ យកទៅតម្កល់ទុកនៅមន្ទីរពេទ្យកាល់ម៉ែត រាជធានីភ្នំពេញ វេលាម៉ោង ២០និង៤៥នាទី ថ្ងៃទី០១ ខែមេសា ឆ្នាំ២០១៣ ។
គួរបញ្ជាក់ថា ជនរងគ្រោះនេះមានឈ្មោះថា THIERRY HUGHES COSTA ភេទប្រុស អាយុ ៤០ឆ្នាំ សញ្ជាតិបារាំង មុខរបរ វេជ្ជបណ្ឌិត កាន់លិខិត ឆ្លងដែនលេខ 04CE 62418 ផុតកំណត់ថ្ងៃទី១៨ ខែមីនា ឆ្នាំ២០១៤ ទិដ្ឋាការលេខ CI.00013294 ផុតកំណត់ថ្ងៃទី២១ ខែមិថុនា ឆ្នាំ២០១៣ ចូលមក កម្ពុជាតាមច្រកអន្តរជាតិ ភ្នំពេញ មកដល់ក្រុងព្រះសីហនុ ថ្ងៃទី៣០ ខែមីនា ឆ្នាំ២០១៣ ។
តាមសាក្សីនៅកន្លែងកើតហេតុ បានប្រាប់មជ្ឈមណ្ឌលព៌ត័មានដើមអម្ពិលថា ជនរងគ្រោះអាចសង្ស័យស្លាប់ បណ្តាលមកពីគាត់មាន វិប្បដិសារី ខ្លាំងពេក ចំពោះសារព៌ត័មានធំៗ នៅស្រុកបារាំង ដែលធ្វើការតិទៀនយ៉ាងខ្លាំងក្លាថា គាត់គ្មានសមត្ថភាពក្នុងការសង្រ្គោះ ពលរដ្ឋបារាំងម្នាក់ ដែលទើបតែស្លាប់នាពេលថ្មីៗនេះ ខណៈដែលពលរដ្ឋបារាំងរូបនោះ ចូលរួមថតកុនឲ្យក្រុមហ៊ុន បារាំង Adventure Line Productions បានថតកុន ដើម្បីចាក់តាមទូរទស្សន៍ នៅស្រុកបារាំង មានឈ្មោះថា កោះឡង់តា KOH LANTA ដែលថតតាមបែបជីវិតផ្សងព្រេង។ កម្មវិធីទូរទស្សន៍នោះ ត្រូវបានថតនៅលើកោះរ៉ុង នៅខេត្តព្រះសីហនុ៕
