បន្ទាយមានជ័យ៖ ក្មេងស្រី អាយុ ១០ឆ្នាំ ជាសិស្សថ្នាក់ទី៣ នៃសាលាបឋមសិក្សាចារថ្មីម្នាក់ ត្រូវបានជនសង្ស័យម្នាក់ បានបោកថា ទៅបើកអំណោយ ហើយបានឌុបយកទៅរំលោភនៅក្នុងព្រៃខាងលិចភូមិភាស ឃុំសារង្គ ស្រុកស្វាយចេក ខេត្តបន្ទាយមានជ័យ បន្ទាប់ពីធ្វើសកម្មភាពរួច ជនសង្ស័យបិតសាប៊ូបាត់ រីឯជនរងគ្រោះត្រូវបានអ្នកស្រុកប្រទះឃើញ ក៏រាយការណ៍ឲ្យសមត្ថកិច្ចដឹកទៅសង្រ្គោះ នៅមន្ទីពេទ្យ ទាំងល្ងាច…។
សមត្ថកិច្ចស្រុកមង្គលបូរី បានបង្ហើបឲ្យដឹងថា កុមារីរងគ្រោះ មានឈ្មោះអាន ចន្ទថ្លា អាយុ១០ ឆ្នាំ ជាសិស្សសាលាបឋមសិក្សាចារថ្មី និងមានទីលំនៅក្នុងភូមិផ្អាវ ឃុំគោកបល្ល័ង ស្រុកមង្គលបូរី ខេត្តបន្ទាយមានជ័យ។ រូបនាងជាកូនទី៣ ក្នុងចំណោមបងប្អូន ៤នាក់ និងមានឪពុកឈ្មោះអាន កែ អាយុ ៣៧ឆ្នាំ និងម្តាយឈ្មោះរ៉ាយ ញែវ អាយុ ៣៤ឆ្នាំ ។ នៅមុនពេលកើតហេតុ ឪពុកម្តាយបានចេញទៅស៊ីឈ្នួលកាប់អំពៅឲ្យគេ នៅជាយដែនថៃ អស់រយៈពេលជាង ២០ថ្ងៃមកហើយ ដោយទុកឲ្យកុមារីរងគ្រោះរស់នៅជាមួយជីតាចាស់ពិការ និងបងៗរបស់វា ២នាក់ទៀត ដែលរៀននៅសាលា ផ្សេងគ្នា។ នៅថ្ងៃកើតហេតុ វេលាម៉ោង១១ និង ៥នាទីព្រឹកថ្ងៃទី ១៤ មីនា ឆ្នាំ២០១៣ កុមារីបានចេញមកពីសាលារៀនស្រាប់តែបានជួបជនសង្ស័យ ដែលបានជិះម៉ូតូ ម៉ាកសង់សេរីចាស់ ពណ៌ ប្រផេះ បានកុហកនាងឲ្យឡើងជិះម៉ូតូជាគេថា ឲ្យនាងទៅបើកអំណោយ កុមារីរងគ្រោះ ក៏បានទៅជាមួយគេ។
កុមារីរងគ្រោះ ពេលកំពុងសម្រាកព្យាបាល នៅមន្ទីរពេទ្យ
ប្រភពដដែលបានបន្តថា ជនសង្ស័យ បានជិះម៉ូតូពីស្រុកមង្គលបូរី ឆ្ពោះទៅកាន់ស្រុកស្វាយចេក តាមផ្លូវ ជាតិលេខ៦ និងបត់ចូលទៅតាមផ្លូវលំបុស្បូវឆ្ពោះទៅកាន់ស្រុកស្វាយចេក មកដល់ចំណុចព្រៃ ខាងលិចភូមិភាស ឃុំសារង្គ ជនសង្ស័យក៏បានធ្វើសកម្មភាពរំលោភទៅលើកុមារីរងគ្រោះ រហូតបានសម្រេច ក៏ឡើងម៉ូតូជិះគេចខ្លួនបាត់ស្រមោលតែម្តង។ ដោយទុក ឲ្យកុមារីរងគ្រោះដើរកាត់ព្រៃ ដើម្បីរកអ្នកស្រុកឲ្យជួយ រហូតដល់វេលាម៉ោង ១៥និង ២០នាទីថ្ងៃដដែលនោះ ក៏បានជួបប្រជាពលរដ្ឋដែលនៅឃ្វាលគោនៅក្បែរនោះ ដោយឃើញអាការស្លេកស្លាំង និងមានឈាមហូរចេញពីប្រដាប់ភេទផង ប្រជាពលរដ្ឋក៏បានរាយការណ៍ប្រាប់សមត្ថកិច្ចមូលដ្ឋាន ដើម្បីជួយនាំកុមារីទៅសង្រ្គោះបឋមនៅមណ្ឌលសុខភាពស្វាយចេក និងបញ្ជូនជនរងគ្រោះ ទៅមន្ទីពេទ្យបង្អែក ស្រុកមង្គលបូរីបន្ត ដោយសារឈាមហូរចេញពីប្រដាប់ភេទច្រើនពេក។
លោកអាន កែ និងអ្នកស្រីរ៉ាយ ញែវ (ឪពុកម្តាយក្មេងស្រីរងគ្រោះ)
ជុំវិញរឿងនេះ លោកយ៉ត សុផល អធិការនគរបាល ស្រុកមង្គលបូរី បានកំពុងតែដុតដៃដុតជើង ស្រាវជ្រាវជនសង្ស័យដែលកំពុងតែគេចខ្លួនយកមកដាក់ទោសតាមច្បាប់ផងដែរ ។ ប៉ុន្តែ ដោយមើល ឃើញភាពខ្វះខាតរបស់ក្រុមគ្រួសារជនរងគ្រោះ លោកក៏បានចំណាយថវិកាផ្ទាល់ខ្លួន ៥ម៉ឺនរៀលជូនជនរងគ្រោះ។ ជាមួយគ្នានោះកុមារីរងគ្រោះ ក៏ត្រូវបានយកចិត្តទុកដាក់ និងឧបត្ថមពីសំណាក់អង្គការស្រ្តីមានវិបត្តិ ហៅកាត់ថា(WCC)ជួយចេញរាល់ការចំណាយនៅក្នុងមន្ទីពេទ្យផងដែរ។
លោកអាន កែ និងអ្នកស្រីរ៉ាយ ញែវ ជាឪពុកម្តាយក្មេងស្រីរងគ្រោះ និងអ្នកភូមិជាច្រើនទៀត កំពុងតែរងចាំមើលថ្វីដៃសមត្ថកិច្ចនគរបាលខេត្តបន្ទាយមានជ័យ តើអាចចាប់ជនសង្ស័យមកផ្តន្ទាទោសតាមច្បាប់បានឬអត់។
នេះជាមេរៀនមួយ សម្រាប់ឪពុកម្តាយទាំងឡាយ គួរប្រុងប្រយ័ត្នចំពោះកូនផង ពិសេសក្មេងស្រី ដែលងាយរងការរំលោភពីជនអគតិល្មោភកាម ។ លោកអ្នកគួរណែនាំកូន ឱ្យរង់ចាំឪពុកម្តាយ ឬសាច់ញាតិ មកទទួល និងហាមកូនទទួលយករបស់ពីមនុស្សប្លែកមុខ ឬទៅជាមួយ៕
តំណាងអង្គការWCC និងលោកយ៉ត សុផល ផ្តល់ថវិកាឲ្យជនរងគ្រោះ