ចុងក្រោយនេះ គេសង្កេតឃើញថា អ្នកមេម៉ាយចាយរាង កែវ និសា ហាក់កំពុងតែមានយីអ៊ុនឡើងក្រឺតៗ ស្របពេលដែលលេចឮពាក្យចចាមអារ៉ាមថា មានឧកញ៉ាម្នាក់ តាមសុំស្នេហ៍នាង យ៉ាងប្រកិត រួមទាំងលេចឮពីចំណងស្នេហ៍ឆ្លងដែនផងនោះ។ ទោះយ៉ាងណា កែវ និសា ពេលនេះ នៅតែខ្លាចកាមេរ៉ាអ្នកកាសែត និង មិនព្រមចេញមុខបកស្រាយជម្រះមន្ទិលស្នេហ៍ឱ្យជ្រះស្រឡះទេ…។
បើទោះបីជាកែវ និសា មានឈ្មោះជា ស្រីមេម៉ាយក៏ពិតមែន ប៉ុន្តែ រូបសម្រស់ គឺក្រមុំ មិនដូរឡើយ។ ជាធម្មតា គ្រាន់តែនាងបង្ហាញកាយ នៅលើឆាកតន្ត្រី ឬក៏ឈរកាន់ក្បាលមីក្រូ ធ្វើជាពិធីការិនីម្តងៗ ជាមួយនឹងសម្លៀកបំពាក់សិចស៊ី ខើចលើ ខើចក្រោម ចេញសាច់សខ្ចីនេះ បណ្តាលឱ្យទស្សនិកជន ភាគច្រើន បុរសៗជ្រួលជ្រើមដកកចំហមាត់ ប្រឹងសម្លឹងមើលនាងស្ទើរមិនប៉ប្រិចភ្នែក។
អ្នកមេម៉ាយចាយរាង កែវ និសា តែងទទួលបាននូវការកោតសរសើរ ពីសំណាក់បុរសជាច្រើនថា នាងពិតជាស្អាតអស្ចារ្យណាស់ ពិសេសគឺ រង្វង់ភ័ក្ត្រស្រស់ផូរផង់ សមនឹងបបូរមាត់ញញឹមមានស្នេហ៍ គួរឱ្យបេតី ទើបធ្វើឱ្យបុរសៗជាច្រើនឈ្លក់វង្វេងនឹងសម្រស់របស់នាង។ ទន្ទឹមនឹងនេះដែរ អ្នកមេម៉ាយសម្បូរមន្តស្នេហ៍រូបនេះ ក៏ពោរពេញ ទៅដោយពាក្យចចាមអារ៉ាមស្នេហារុំព័ទ្ធបន្តកន្ទុយគ្នារដឹកផងដែរ ប៉ុន្តែ ទោះយ៉ាងណា រាល់ព័ត៌មានទាំងឡាយ ដែលបានបោកបក់មកលើនាង តាំងពីដើម រហូតមកទល់នឹងពេលនេះ កែវ និសា តែងតែបដិសេធ មិនដែលទទួលស្គាល់ម្តងណាឡើយ។
មួយរយៈចុងក្រោយនេះ កែវ និសា ហាក់កំពុងតែមានយីអ៊ុនឡើង ក្រឺតៗតែម្តង។ នាងមិនត្រឹមតែមានការងារសម្តែងយ៉ាងសស្រាក់សស្រាំ ប៉ុណ្ណោះទេ ពេលនេះ នាងកំពុងតែទទួលតំណែងជាពិធីការិនី របស់ស្ថានីយទូរទស្សន៍ My TV នៅក្នុងកម្មវិធី “រង្វាន់ទេវតា”, “សំណើចរាត្រី” និង “ហ្គេមសេដ្ឋី” ថែមទាំងឆ្លៀតឱកាសឡើងច្រៀងនៅតាមបណ្តាស្ថានីយ ទូរទស្សន៍នានា រាល់ចុងសប្តាហ៍ ញឹកញាប់ទៀតផង។
ទន្ទឹមនឹងមានរាសីខ្ពស់ត្រដែតនេះដែរ កែវ និសា ក៏កំពុងត្រូវគេ សង្ស័យថា មានឧកញ៉ាម្នាក់ដែលមានទ្រព្យហូរហៀរ និងមានឥទ្ធិពល តាមសុំស្នេហ៍យ៉ាងប្រកិត ប៉ុន្តែ ពេលសាកសួរនាងពេលណា នាងតែងធ្វើការច្រានចោលចំពោះពាក្យចចាមអារ៉ាមនេះជានិច្ច។
កាលពីថ្ងៃទី០៨ មីនា ក្នុងកម្មវិធីខួប១០ឆ្នាំ របស់ស្ថានីយទូរទស្សន៍CTN នៅកោះពេជ្រ មានតារាចម្រៀង និងសម្តែងល្បីៗ ជាច្រើនបានមក ចូលរួម ពិសេស បុគ្គលិក និងពិធីករ-ពិធីការិនី CTN មកជុំគ្នាទាំងអស់ ក្នុងនោះក៏មានពិធីការិនីថ្មី កែវ និសា បានបង្ហាញខ្លួនយ៉ាងស្រស់ស្អាត ផងដែរ។ ប៉ុន្តែ គេសម្គាល់ថា ក្នុងពេលដែលពិធីការិនីជើងចាស់ថ្មីទាំងអស់ សុទ្ធតែបានឈរកាច់រាងនៅចំពោះមុខកាមេរ៉ាអ្នកកាសែតគ្រប់ៗគ្នា សូម្បីតែកំពូលតារាចម្រៀងល្បី មាស សុខសោភា និងកញ្ញាអីុវ៉ា ដែលតែងគេច កាមេរ៉ាអ្នកកាសែតនោះ ក៏ឈរញញឹមឱ្យអ្នកាសែត ថតដោយរីករាយ នោះ អ្នកមេម៉ាយស្រស់ខ្ចី ពិធីការិនីថ្មី កែវ និសា បែរជាមានទឹកមុខ មិនសូវស្រស់ ហើយគេចកាមេរ៉ាអ្នកកាសែតទៅវិញ ព្រមទាំងប្រញាប់ប្រញាល់ចេញទៅវិញភ្លាម ដោយនាងមិនបាននៅលេងសើចជាមួយនឹង ពិធីករ-ពិធីការិនីដទៃទៀតយូរឡើយ។
អ្នកយកព័ត៌មានយើងបានទាក់ទងកែវ និសា ដើម្បីសុំការបំភ្លឺពី រឿងនេះដែរ តែទូរស័ព្ទរបស់នាង មិនអាចទាក់ទងបានឡើយ។
គួរបញ្ជាក់ដែរថា កែវ និសា តារាសម្តែងមុខស្រស់ បានលេចធ្លោខ្លាំង តាមរយៈការសម្តែងរឿងភាគទូរទស្សន៍បាយ័ន ជាតួឯកជាបន្តបន្ទាប់ ប៉ុន្តែ ក្រោយពេលធ្លាយរឿងប្តឹងលែងប្តី និងរងពាក្យចចាមអារ៉ាមថ្មីៗរឿងស្នេហា ជារឿយៗនោះ ធ្វើឱ្យតារារូបស្រស់នេះហាក់មិនសូវចង់ចេញមុខ តែ ដោយសារនាងជាតារាសិល្បៈ ទើបពិបាកក្នុងការព្យាយាមលាក់មុខ។
ជាមួយគ្នានេះ អ្នកសិល្បៈ និងទស្សនិកជនភាគច្រើន ជឿថា បើកែវ និសា មិនខ្លាចកាមេរ៉ាអ្នកកាសែត ហើយស្វាគមន៍រាល់ការសុំសេចក្តីបកស្រាយបំភ្លឺ ចំពោះពាក្យលេចឮផ្សេង។ ដែលទស្សនិកជនចង់ដឹងនោះ នាងនឹងកាន់តែ ល្បីឈ្មោះ លេចធ្លោក្នុងពិភពសិល្បៈថែមទៀតមិនខាន ព្រោះនាងជាតារាស្រី រូបស្រស់ មុខមានមន្តស្នេហ៍ គួរឱ្យស្រលាញ់ចូលចិត្ត ហើយមានទេពកោសល្យសិល្បៈសម្តែងល្អទៀតផង…៕
ប្រភព អង្គរធំមេឌា
